بلاول پنجاب کی ترقی پرتنقید کے بجائے اپنے صوبے پر توجہ دیں‘رانا سکندرحیات

پیر 27 جولائی 2026 19:35

لاہور(اُردو پوائنٹ اخبارتازہ ترین - این این آئی۔ 27 جولائی2026ء) وزیر تعلیم پنجاب رانا سکندر حیات نے کہا ہے کہ بلاول بھٹو پنجاب کی ترقی پر تنقید کے بجائے اپنے صوبے پر توجہ دیں،وزیراعلی مریم نواز کی قیادت میں پنجاب میں تعلیم اور ترقی کے شعبوں میں انقلابی اقدامات کیے جا رہے ہیں، اپوزیشن خصوصاًپیپلز پارٹی کو تنقید کے بجائے اپنی کارکردگی پر توجہ دینی چاہیے۔

ڈی جی پی آر میں پریس کانفرنس کرتے ہوئے انہوں نے کہا کہ پنجاب کے نوجوانوں کو سکالرشپس اور لیپ ٹاپ فراہم کیے جا رہے ہیں، دانش سکول جیسے منصوبوں کی مثال ملک میں نہیں ملتی اور سکولوں میں طلبہ کے داخلوں میں ریکارڈ اضافہ ہوا ہے۔انہوںنے کہا کہ سکولوں کی آئوٹ سورسنگ سے تعلیمی شعبے میں بہتری آئی ہے اور وزیراعلی مریم نواز کی خصوصی توجہ تعلیم کے معیار کو بہتر بنانے پر مرکوز ہے۔

(جاری ہے)

رانا سکندر حیات نے کہا کہ پنجاب حکومت کے متعدد ترقیاتی منصوبوں کو سندھ حکومت نے نقل کیا، اگر پیپلز پارٹی کو بحث کرنی ہے تو وہ ترقیاتی منصوبوں اور عوامی خدمت کی بنیاد پر کرے، پیپلز پارٹی کے پاس دانش سکول جیسا کوئی منصوبہ نہیں اور آج کا نوجوان بھی ان کے ساتھ نہیں ہے۔وزیر تعلیم رانا سکندر حیات نے کہا کہ ستھرا پنجاب پروگرام کے تحت گلی محلوں کی صفائی کو یقینی بنایا جا رہا ہے جبکہ انہیں یقین ہے کہ آزاد کشمیر کے انتخابات میں نواز شریف اور مریم نواز کی کارکردگی کی بنیاد پر مسلم لیگ کامیابی حاصل کرے گی۔