سردار محمدابراہیم خان کا آزادکشمیر کی آئینی جدوجہد میں بھی اہم کردار ہے،چوہدری لطیف اکبر

جمعرات 30 جولائی 2026 23:16

مظفرآباد(اُردو پوائنٹ اخبارتازہ ترین - آن لائن۔ 30 جولائی2026ء) قائمقام صدر ریاست آزاد جموں وکشمیر چوہدری لطیف اکبر نے کہا ہے کہ غازی ملت سردارمحمد ابراہیم خان مرحوم نہ صرف آزادکشمیر کے پہلے بانی صدر تھے بلکہ انہوں نے آزادکشمیر کی آزادی میں اہم کردار ادا کیا اور تحریک آزادی کشمیر کی قیادت بھی کی اور اقوام متحدہ میں بھی کشمیریوں کی نمائندگی کی اور اس خطے کو آزاد کرایا۔

انہوں نے کہا کہ 19 جولائی 1947 کو سردار محمد ابراہیم خان کی سرینگر میں رہائش گاہ پر قرارداد الحاق پاکستان منظور کی گئی جس سے کشمیریوں نے اپنے مستقبل کا تعین پاکستان کے ساتھ کیا۔ ان خیالات کا اظہار اُنہوں نے غازی ملت سردار محمد ابراہیم خان کی برسی کے موقع پراپنے خصوصی پیغام میں کیا۔

(جاری ہے)

انہوں نے کہا کہ انشاء اللہ کشمیری اپنے آباء واجداد کے نظریہ الحاق پاکستان کو عملی شکل دے کر رہیں گے جس کے لئے لاکھوں کشمیریوں نے اپنی جانوں کا نذرانہ پیش کیا ہے اور اب بھی مسلسل قربانیاں دے رہے ہیں۔

انہوں نے کہا کہ سردار محمدابراہیم خان کا آزادکشمیر کی آئینی جدوجہد میں بھی اہم کردار ہے آزادکشمیر کی تعمیر وترقی میں سردار محمد ابراہیم خان کی خدمات کو نظر انداز نہیں کیا جا سکتا۔غازی ملت سردار محمد ابراہیم خان نے 24اکتوبر 1947کو آزادکشمیر میں بننے والی حکومت کی بنیاد رکھی اور صدر بنے، وہ آزادکشمیر کے پہلے بانی صدر ہیں۔ اس موقع پر قائمقام صدر ریاست آزاد جموں وکشمیر چوہدری لطیف اکبرنے اپنے پیغام میں مزید کہا کہ آج غازی ملت سردار محمد ابراہیم خان کی برسی کے موقع پر اس بات کا تجدید عہد کرتے ہیں کہ ہم آزادی کے بیس کیمپ سے مسئلہ کشمیر کو بین الاقوامی سطح پر اُٹھانے اور بھارت کی جانب سے مقبوضہ کشمیر میں جاری انسانی حقوق کی پامالی کو رکوانے اور مقبوضہ کشمیر کی آزادی تک اپنی جدوجہد جاری رکھیں گے۔

مرحوم نہ صرف آزادکشمیر کے پہلے بانی صدر تھے بلکہ انہوں نے آزادکشمیر کی آزادی میں اہم کردار ادا کیا اور تحریک آزادی کشمیر کی قیادت بھی کی اور اقوام متحدہ میں بھی کشمیریوں کی نمائندگی کی اور اس خطے کو آزاد کرایا۔