دہشت گردی کے خاتمے کیلئے باہمی اتحاد ناگزیر ،سکیورٹی فورسز کی قربانیاں قابل تحسین ہیں۔گورنرپنجاب

جمعہ 31 جولائی 2026 20:51

لاہور (اُردو پوائنٹ اخبارتازہ ترین - اے پی پی۔ 31 جولائی2026ء) گورنر پنجاب سردار سلیم حیدر خان نے کہا کہ دہشت گردی اور فرقہ واریت کے خاتمے کے لئے باہمی اتحاد و اتفاق ناگزیر ہے،اسلام میں دشت گردی،فرقہ واریت کی کوئی گنجائش نہیں،دہشت گردی کے خلاف سکیورٹی فورسز کی قربانیاں قابل تحسین ہیں۔ان خیالات کا اظہار انہوں نے گورنر ہائوس میں تحریک منہاج القرآن کے ناظم اعلی خرم نواز گنڈا پور کی قیادت میں وفد سے ملاقات کے دوران گفتگو کرتے ہوئے کیا۔

ملاقات میں ملکی مجموعی سیاسی صورتحال اور حالت حاضرہ پر تبادلہ خیال کیا گیا۔گورنر پنجاب نے کہا کہ ملک میں ہونے والی دہشت گردی امن وامان اور ترقی کی راہ میں سب سے بڑی رکاوٹ ہے، دین اسلام ہمیں امن و سلامتی کا درس دیتا ہے،ملک سے دہشتگردی،فرقہ واریت کا خاتمہ کرنا ہے تو ہمیں سب سے پہلے اپنی صفوں میں اتحاد پیداکرنا ہوگا۔

(جاری ہے)

انہوں نے کہا کہ ہماری سکیورٹی فورسز کے جوان اپنی جانوں پر کھیل کر امن و امان قائم رکھنے کی کوشش کررہے ہیں، پیپلز پارٹی اور حکومت ملک میں امن و امان کی صورتحال پر ایک پیج پرہیں۔

گورنر پنجاب نے مزید کہا کہ ملکی استحکام کے لیے تمام سیاسی جماعتوں کو اختلافات بھلا کر مل کر کام کرنا ہوگا، عوام مہنگائی اور روزانہ کی بنیاد پرپٹرولیم مصنوعات کی قیمتوں میں اضافے سے پریشان ہیں۔اس موقع پر تحریک منہاج القرآن کے وفد نے کہا کہ صحت اور تعلیم کی سہولیات بالخصوص دور دراز وپسماندہ علاقوں میں فراہمی حکومت کی ترجیح ہونی چاہئے۔