پیپلز پارٹی آزاد کشمیر الیکشن سیل کی حلقہ ایل اے 27 مظفرآباد ون (کوٹلہ) کے حوالے سے چیف الیکشن کمشنر آزاد کشمیر کو شکایت ارسال

منگل 4 اگست 2026 18:43

مظفرآباد (اُردو پوائنٹ اخبارتازہ ترین - اے پی پی۔ 04 اگست2026ء) پاکستان پیپلز پارٹی آزاد کشمیر الیکشن سیل نے حلقہ ایل اے 27 مظفرآباد ون (کوٹلہ) کے حوالے سے چیف الیکشن کمشنر آزاد کشمیر کو ہنگامی شکایت ارسال کرتے ہوئے کہا ہے کہ گورنمنٹ بوائز سکول سیری کرلان کے پولنگ سٹیشن نمبر 156 پر پاکستان پیپلز پارٹی کے پولنگ ایجنٹ کو محصور کر کے اس کی قانونی ذمہ داریاں ادا کرنے سے روک دیا گیا ہے جبکہ مرد و خواتین دونوں پولنگ بوتھس پر جعلی ووٹنگ جاری ہے۔

کمیشن کو دی گئی تحریری شکایت میں کہا گیا ہے کہ حلقے سے موصول ہونے والی اطلاعات کے مطابق پیپلز پارٹی کے پولنگ ایجنٹ کو پولنگ سٹیشن کے اندر محصور کر دیا گیا ہے جس کے باعث وہ نہ اپنے قانونی فرائض انجام دے پا رہا ہے اور نہ ہی پولنگ کے عمل کی نگرانی کر سکتا ہے۔

(جاری ہے)

پارٹی کے مطابق آزادانہ نگرانی ختم ہونے کے بعد پولنگ سٹیشن نمبر 156 میں ہونے والی پولنگ کو شفاف اور قابل اعتماد قرار نہیں دیا جا سکتا۔

پیپلز پارٹی نے موقف اختیار کیا ہے کہ یہ عمل آزاد جموں و کشمیر الیکشن ایکٹ 2020 اور الیکشن کمیشن کے ضابطہ اخلاق کی سنگین خلاف ورزی ہے جو آزاد، منصفانہ اور شفاف انتخابات کے بنیادی اصولوں کو نقصان پہنچا رہی ہے۔پیپلز پارٹی نے الیکشن کمیشن سے مطالبہ کیا ہے کہ ڈسٹرکٹ ریٹرننگ آفیسر، ریٹرننگ آفیسر حلقہ ایل اے 27 اور ضلعی پولیس کو فوری ہدایات جاری کی جائیں تاکہ محصور کیے گئے پیپلز پارٹی کے پولنگ ایجنٹ کو فوری طور پر آزاد کرایا جائے، اسے اپنی قانونی ذمہ داریاں انجام دینے کی اجازت دی جائے ۔

یہ شکایت پاکستان پیپلز پارٹی آزاد کشمیر الیکشن سیل کے انچارج عبدالشکور کی جانب سے چیف الیکشن کمشنر آزاد کشمیر کو ارسال کی گئی جس کی نقول متعلقہ ریٹرننگ آفیسر اور ڈسٹرکٹ ریٹرننگ آفیسر کو بھی بھجوائی گئی ہیں۔