الحمدللہ آج پاکستان دنیا کے طاقتور ممالک کی صف میں کھڑا ہے‘عظمیٰ بخاری

جمعہ 14 اگست 2026 22:03

لاہور (اُردو پوائنٹ اخبارتازہ ترین - این این آئی۔ 14 اگست2026ء) وزیر اطلاعات و ثقافت پنجاب عظمیٰ بخاری نے جشن آزادی کے موقع پر اپنے خصوصی ویڈیو پیغام میں پوری قوم کو وزیراعلیٰ پنجاب مریم نواز شریف اور اپنی جانب سے جشن آزادی کی مبارکباد پیش کی ہے۔عظمیٰ بخاری نے کہا کہ پاکستان ہمیں پلیٹ میں رکھ کر نہیں ملا بلکہ اس ملک کے حصول کے لیے ہمارے آباؤ اجداد نے بے شمار قربانیاں دیں۔

1947 سے آج تک پاکستان نے جو سفر طے کیا ہے وہ انتہائی قابلِ قدر اور قابلِ فخر ہے۔وزیر اطلاعات پنجاب نے کہا کہ آج پاکستان کو ہر فورم پر عزت مل رہی ہے۔ دنیا میں ثالثی کی بات ہو، جنگ رکوانے کی بات ہو یا بڑے فیصلے کا معاملہ ہو، ہر جگہ پاکستان کا نام آتا ہے۔ پاکستان آج دنیا کے طاقتور ممالک کی صف میں کھڑا ہے۔

(جاری ہے)

انہوں نے کہا کہ آج کے دن ہمیں اس عزم کا ارادہ کرنا ہے کہ پاکستان کو آگے بڑھانے کے لیے سب کو اپنا کردار ادا کرنا ہوگا۔

وزیراعظم شہباز شریف اور فیلڈ مارشل سید عاصم منیر کی قیادت میں پاکستان نے ترقی کرنی ہے۔عظمیٰ بخاری نے وزیراعلیٰ پنجاب مریم نواز شریف کی کارکردگی کو سراہتے ہوئے کہا کہ وزیراعلیٰ پنجاب کی کارکردگی کا پورا پاکستان معترف ہے۔ میری دعا ہے کہ پنجاب کی طرح باقی صوبوں میں بھی ترقی ہو۔انہوں نے اپنے پیغام کے اختتام پر دعا کرتے ہوئے کہا کہ پاکستان کے لوگ اسی طرح آگے بڑھیں، ترقی کریں اور ملک مزید خوشحالی کی جانب گامزن ہو۔