پنجاب کے تعلیمی بورڈز میں پرچوں کی مارکنگ کا طریقہ کار تبدیل کرنے کا فیصلہ

مجموعی جائزے کے بجائے ہر سوال کے نمبروں کی واضح سٹرکچرنگ کی جائے گی‘بورڈ حکام

پیر 17 اگست 2026 14:43

پنجاب کے تعلیمی بورڈز میں پرچوں کی مارکنگ کا طریقہ کار تبدیل کرنے کا ..

لاہور (اُردو پوائنٹ اخبارتازہ ترین - این این آئی۔ 17 اگست2026ء) پنجاب کے تعلیمی بورڈز میں امتحانی پرچوں کی مارکنگ کا طریقہ کار تبدیل کرنے کا فیصلہ کرلیا گیا، جس کے تحت مجموعی جائزے کے بجائے ہر سوال کے نمبروں کی واضح سٹرکچرنگ کی جائے گی۔بورڈ حکام کے مطابق نئے طریقہ کار میں روبریکس مارکنگ متعارف کرائی جائے گی، جس کے ذریعے طلبہ کو ہر سوال کے مقررہ معیار کے مطابق مکمل نمبر حاصل کرنے کا واضح موقع ملے گا۔

نئے مارکنگ سسٹم کا اطلاق لاہور سمیت پنجاب کے تمام تعلیمی بورڈز میں کیا جائے گا۔ حکام کے مطابق اس اقدام کا مقصد امتحانی نظام میں شفافیت لانے کے ساتھ ساتھ مارکنگ کے معیار کو مزید بہتر بنانا ہے۔سوالیہ پرچوں کی تیاری کے معیار کو بہتر بنانے کے لیے پیپر مارکرز سے بھی باقاعدہ فیڈ بیک لیا جائے گا۔

(جاری ہے)

پیپر مارکرز سوالات، ان کے معیار اور مارکنگ کے حوالے سے اپنی رپورٹس متعلقہ تعلیمی بورڈز کو جمع کروائیں گے۔

بورڈ حکام کے مطابق نئے مارکنگ طریقہ کار پر عملدرآمد دوسرے سالانہ امتحانات سے کیا جائے گا۔ نئے نظام کے ذریعے طلبہ کی کارکردگی کا زیادہ شفاف اور معیاری انداز میں جائزہ لینے کی کوشش کی جائے گی۔بورڈ حکام کا کہنا ہے کہ تعلیمی بورڈز کے نتائج کو عالمی سطح پر قابلِ قبول بنانا بنیادی ہدف ہے، جبکہ امتحانی نظام میں شفافیت اور مارکنگ کے معیار کو بہتر بنانے پر خصوصی توجہ دی جائے گی۔