سود خوروں کے خلاف کریک ڈاؤن، ایک ہفتے میں 25 ملزمان گرفتار

لاہور (اُردو پوائنٹ اخبارتازہ ترین - آن لائن۔ 17 اگست2026ء) ڈی آئی جی آپریشنز لاہور فیصل کامران نے کھلی کچہری میں شہریوں کی شکایات براہ راست سنیں اور سود خوری کے خلاف جاری کریک ڈاؤن کے دوران ایک ہفتے میں مختلف علاقوں سے 25 سود خور گرفتار کیے جانے سے آگاہ کیا۔ انہوں نے سود خوروں، ہراساں کرنے والوں اور سماجی جرائم میں ملوث عناصر کے خلاف زیرو ٹالرنس پالیسی اپنانے کی ہدایت کی۔

ڈی آئی جی آپریشنز فیصل کامران کی زیرصدارت کھلی کچہری میں شہریوں نے سود خوری، لین دین کے فراڈ، آن لائن دھوکہ دہی، گھریلو تشدد اور ہراساں کیے جانے سے متعلق شکایات پیش کیں۔ ڈی آئی جی آپریشنز نے متعلقہ پولیس افسران کو شکایات پر فوری قانونی کارروائی کی ہدایات جاری کردیں۔کھلی کچہری میں سود خوری کی مزید تین درخواستیں موصول ہوئیں۔

(جاری ہے)

درخواست گزاروں نے شکایت کی کہ انہوں نے 60 ہزار اور 40 ہزار روپے لیے، لاکھوں روپے واپس کرنے کے باوجود مزید رقم کا مطالبہ کیا جارہا ہے۔ ڈی آئی جی آپریشنز نے ایس ایچ او شیرا کوٹ اور شفیق آباد کو شکایات پر کارروائی کا حکم دے دیا۔فیصل کامران نے بتایا کہ کھلی کچہری میں مسلسل شکایات موصول ہونے پر سود خوروں کے خلاف کریک ڈاؤن شروع کیا گیا، جس کے دوران ایک ہفتے میں مختلف علاقوں سے 25 سود خور گرفتار کیے گئے۔

انہوں نے کہا کہ سود خوروں کے خلاف زیرو ٹالرنس پالیسی ہے، قرض کے نام پر شہریوں کو بلیک میل یا ہراساں کرنے والوں کے خلاف کارروائی کی جائے گی۔کھلی کچہری میں لین دین کے فراڈ کی متعدد شکایات بھی سامنے آئیں۔ ڈی آئی جی آپریشنز نے ایس ڈی پی او گجرپورہ اور متعلقہ ایس ایچ اوز کو قانونی کارروائی کی ہدایت کی۔ ایک شہری نے چار لاکھ روپے کی امانت میں خیانت کی شکایت کی، جس پر ایس ایچ او گجرپورہ کو کارروائی کا حکم دیا گیا۔

ایک درخواست گزار نے آن لائن فراڈ کی شکایت کرتے ہوئے بتایا کہ اس نے لیپ ٹاپ فروخت کیا تاہم خریدار کی جانب سے جعلی ادائیگی کی رسید بھیجی گئی۔ ڈی آئی جی آپریشنز نے ایس ایچ او نشتر کالونی کو معاملے پر قانونی کارروائی کی ہدایت کی۔گھریلو تشدد کی شکایت پر ایس ایچ او مناواں کو فوری کارروائی، جبکہ تشدد اور دھمکیوں سے متعلق شکایات پر ایس ڈی پی او باغبانپورہ کو انکوائری کا حکم دیا گیا۔

ڈی آئی جی آپریشنز فیصل کامران نے کہا کہ کھلی کچہری میں موصول ہونے والی ہر شکایت پر فوری کارروائی پولیس کی ذمہ داری ہے۔ ہراسگی اور سماجی جرائم کے خلاف زیرو ٹالرنس پالیسی پر عملدرآمد جاری رہے گا۔انہوں نے کہا کہ شہریوں کو تحفظ اور قانونی رہنمائی فراہم کرنا پولیس کا فرض ہے۔ کھلی کچہری کا مقصد عوام اور پولیس کے درمیان فاصلہ کم کرنا اور شہریوں کا اعلیٰ پولیس افسران سے براہ راست رابطہ مؤثر بنانا ہی