ڈپٹی کمشنر خوشاب کی زیرِ صدارت پرائس کنٹرول مجسٹریٹس کی کارکردگی کا جائزہ اجلاس

جمعرات 20 اگست 2026 17:31

جوہرآباد (اُردو پوائنٹ اخبارتازہ ترین - اے پی پی۔ 20 اگست2026ء) ڈپٹی کمشنر خوشاب ڈاکٹر جہانزیب حسین لابر کی زیرِ صدارت اشیائے خورد و نوش کی قیمتوں پر مؤثر کنٹرول، پرائس کنٹرول مجسٹریٹس کی روزانہ کی کارکردگی کا جائزہ اجلاس ہوا۔ ڈپٹی کمشنر ڈاکٹر جہانزیب حسین لابر نے اجلاس سے خطاب کرتے ہوئے ہدایت کی کہ تمام پرائس کنٹرول مجسٹریٹس روزانہ کی بنیاد پر فیلڈ میں متحرک رہیں اور گھی، آٹا، چینی، پھل، سبزیاں، گوشت، چکن، بیسن، دالیں، دودھ، دہی، روٹی، بیکری آئٹمز سمیت تمام اشیائے ضروریہ کی قیمتوں کی باقاعدگی سے جانچ پڑتال کریں۔

انہوں نے کہا کہ سرکاری نرخوں سے زائد قیمت وصول کرنے والے دکانداروں کے خلاف بلاامتیاز کارروائی کرتے ہوئے جرمانے عائد کیے جائیں اور ریٹ لسٹوں کی نمایاں مقامات پر آویزاں کرنے کے احکامات پر سختی سے عملدرآمد یقینی بنایا جائے۔

(جاری ہے)

ڈپٹی کمشنر نے کہا کہ مارکیٹوں میں اشیائے ضروریہ کی قیمتوں کی مسلسل نگرانی کی جائے تاکہ شہریوں کو مقررہ نرخوں پر معیاری اشیاء کی فراہمی یقینی بنائی جا سکے۔

انہوں نے واضح کیا کہ صارفین کا استحصال کسی صورت برداشت نہیں کیا جائے گا اور ناجائز منافع خوری و ذخیرہ اندوزی کے خلاف بلاامتیاز کارروائیاں جاری رکھی جائیں۔ انہوں نے مزید کہا کہ وزیراعلیٰ پنجاب مریم نواز شریف کی ہدایات کے مطابق صوبہ بھر میں اشیائے ضروریہ کی قیمتوں کی مسلسل مانیٹرنگ کی جا رہی ہے اور عوام کو ریلیف کی فراہمی حکومت کی اولین ترجیح ہے۔ ڈپٹی کمشنر نے متعلقہ اداروں کو ہدایت کی کہ شہریوں کے تحفظ کو یقینی بنانے کے لیے ڈاگز کنٹرول مہم کو مزید مؤثر اور منظم انداز میں جاری رکھا جائے۔\378