راولپنڈی میں 6 ماہ کیلئے فوج تعینات کرنے کی منظوری

شہر کی حساس عمارتوں، اہم قومی تنصیبات اور شاہراہوں پر سکیورٹی انتظامات کو مزید سخت اور مؤثر بنایا جائے گا

ساجد علی ہفتہ 22 اگست 2026 12:52

راولپنڈی میں 6 ماہ کیلئے فوج تعینات کرنے کی منظوری

اسلام آباد (اُردو پوائنٹ اخبارتازہ ترین۔ 22 اگست 2026ء) وفاقی حکومت نے راولپنڈی میں امن و امان کی صورتحال کو برقرار رکھنے اور ضلعی انتظامیہ کی معاونت کے لیے آئین کے آرٹیکل 245 کے تحت پاک فوج کی تعیناتی کی منظوری دیتے ہوئے باضابطہ نوٹیفکیشن جاری کر دیا۔

(جاری ہے)

اطلاعات کے مطابق اس ضمن میں جاری کردہ نوٹیفکیشن اور حکومتی اعلامیے میں کہا گیا ہے کہ محکمہ داخلہ پنجاب کی جانب سے بھیجی گئی باقاعدہ درخواست پر وفاقی کابینہ نے راولپنڈی میں 6 ماہ کی مدت کے لیے پاک فوج کی 3 کمپنیوں کو تعینات کرنے کی منظوری دی ہے، یہ تعیناتی راولپنڈی کی ضلعی انتظامیہ اور پولیس کے ساتھ مل کر امن و امان کی مجموعی فضا کو پرامن بنانے کے لیے کی گئی ہے۔

حکومتی اعلامیے میں واضح کیا گیا ہے کہ تعینات کی جانے والی فوجی کمپنیاں ضلعی انتظامیہ کی سیکیورٹی اقدامات میں کامل معاونت کریں گی، اس دوران شہر بھر کی حساس عمارتوں، اہم ترین قومی تنصیبات اور اہم شاہراہوں پر سکیورٹی کے تمام انتظامات کو مزید سخت اور مؤثر بنایا جائے گا تاکہ کسی بھی ممکنہ ناخوشگوار واقعے یا بدامنی کا بروقت سدِباب کیا جا سکے۔