ْوعدہ پورا کرنے کیلئے دہائیوں تک تنہائی میں رہنے والا شخص 25 سال بعد اپنے خاندان سے دوبارہ مل گیا

بیجنگ (اُردو پوائنٹ اخبارتازہ ترین - این این آئی۔ 23 اگست2026ء) 60 سال سے زائد عمر کا ایک شخص دہائیوں بعد تنہا ایک گھر کا خیال رکھنے کے بعد آخرکار اپنے خاندان سے واپس مل گیا ہے۔میڈیارپورٹ کے مطابق63 سالہ لی گیو یو نامی شخص کا تعلق چین کے صوبہ سیچوان سے ہے اور حال ہی میں ان کی آفیشل سرکاری رجسٹریشن کرائی گئی۔لی گیو یو نے اپنا گھر 1987 میں 24 سال کی عمر میں چھوڑا تھا اور صوبہ گوانگزو منتقل ہوگئے تھے تاکہ روزگار کے بہتر مواقع مل سکیں۔

وقت کے ساتھ ان کا رابطہ 2 بھائیوں سے ختم ہوگیا تھا،1997میں وہ ایک بار اپنے گھر واپس آئے مگر بھائیوں سے نہیں مل سکے کیونکہ وہ کسی اور جگہ کام کر رہے تھے۔انہوں نے ایک فون نمبر بھی چھوڑا تھا جس پر خاندان نے برسوں تک رابطہ کرنے کی کوشش کی مگر رابطہ نہیں ہوسکا۔

(جاری ہے)

1998میں لی گیو یو صوبہ Heilongjiang کے صدر مقام Harbin منتقل ہوئے جہاں ان کی ملاقات ایک ہوٹل کی مالکہ لین سے ہوئی۔

لین نے لی گیو یو کو ملازمت فراہم کی مگر یہ ہوٹل 3 سال بعد بند ہوگیا، تاہم لین کی جانب سے لی گیو یو کو ایک پہاڑی مقام میں واقع گھر کے دیکھ بھال کی پیشکش کرتے ہوئے یقین دلایا کہ وہ جلد ان سے رابطہ کرکے گھر جانے کی اجازت دیں گی مگر اگلے 26 برسوں تک لین بیجنگ اور روس میں اپنے کاروبار کو چلاتی رہیں اور برسوں بعد مئی 2026 میں اس پہاڑی مکان کا دورہ کیا تاکہ اسے فروخت کرسکیں،مگر وہ یہ دیکھ کر شاک رہ گئیں کہ لی گیو یو اب بھی وہاں موجود تھے اور دیکھ بھال کے وعدے کو پورا کر رہے تھے، جسے لین بھول چکی تھیں۔

لین نے میڈیا سے بات کرتے ہوئے بتایا کہ میرا خیال تھا کہ وہ زیادہ لمبے عرصے تک قیام نہیں کرے گا، مگر میرے ایک جملے کے باعث وہ وہاں برسوں تک رہا۔تنہائی میں برسوں طویل قیام کے دوران لی گیو یو مکئی کواگاتے رہے، مویشیوں کی دیکھ بھال کی اور مچھلیوں کا شکار کرتے رہے،اس گھر سے دکانیں بھی کم از کم 3 کلومیٹر دور تھیں اور ان کا شناختی کارڈ 2005 میں ایکسپائر ہوگیا تھا،نئے شناختی کارڈ کے لیے انہیں اپنے آبائی علاقے میں واپس جانے کی ضرورت تھی اور ان کے پاس وہاں جانے کے پیسے نہیں تھے۔

جب لی گیو یو 25 سال بعد لین سے ملے تو انہوں نے اپنے گھر واپس جاکر بھائیوں سے ملنے کی خواہش ظاہر کی چونکہ لی گیو یو کے پاس شناختی کارڈ نہیں تھا جو ٹرین یا طیارے کے ٹکٹ کو خریدنے کے لیے ضروری تھا، تو لین نے پولیس حکام سے رابطہ کیا جن کی مدد سے لی گیو یو کا ٹرین ٹکٹ مل سکا۔40 گھنٹوں کے طویل سفر کے دوران وہ چونگ چنگ پہنچے جہاں پولیس آفیسر اور حکومتی عملے نے انہیں اپنے ساتھ لیا اور گھر تک پہنچایا، جہاں وہ اپنے بھائیوں سے ملنے میں کامیاب ہوگئے۔وہاں سے وہ اپنے آبائی قصبے میں گئے اور لین بھی ان کے ساتھ تھیں، جہاں ان کا نیا شناختی کارڈ بنا۔