سپریم کورٹ نے عمران خان کی بہن کی توہین عدالت کی درخواست اعتراض لگا کر واپس کردی

وزیراعظم شہباز شریف، وزیر قانون اور وزیر اطلاعات سمیت توہین عدالت کی درخواست میں بنائے گئے تمام فریقین پر الزامات کی فہرست فراہم نہیں کی گئی؛ رجسٹرار آفس کا اعتراض

ساجد علی منگل 25 اگست 2026 12:18

سپریم کورٹ نے عمران خان کی بہن کی توہین عدالت کی درخواست اعتراض لگا ..

اسلام آباد (اُردو پوائنٹ اخبارتازہ ترین۔ 25 اگست 2026ء) رجسٹرار سپریم کورٹ نے عمران خان کی بہن ڈاکٹر عظمیٰ خان کی جانب سے دائر کی جانے والی توہینِ عدالت کی درخواست اعتراضات عائد کرکے واپس کر دی، جس کے بعد پی ٹی آئی نے قانونی نقائص دور کرکے آج ہی دوبارہ رجوع کرنے کا اعلان کردیا۔ رجسٹرار سپریم کورٹ کی جانب سے عائد کردہ اعتراض کے مطابق سابق وزیراعظم کی ہمشیرہ ڈاکٹر عظمیٰ خان کی درخواست میں وزیراعظم شہباز شریف، وزیرِ قانون اور وزیرِ اطلاعات سمیت توہینِ عدالت کی کارروائی کے لیے نامزد کیے گئے تمام فریقین پر عائد الزامات کی باقاعدہ فہرست فراہم نہیں کی گئی، جس کے باعث درخواست ابتدائی طور پر واپس کردی گئی۔

اس پیشرفت پر بات کرتے ہوئے پاکستان تحریکِ انصاف کے رہنما بیرسٹر گوہر علی خان نے بتایا کہ انہوں نے خود رجسٹرار سپریم کورٹ سے رابطہ کیا تو اس کے بعد رجسٹرار صاحب فیسلیٹیشن سینٹر آئے اور مجھ سے ملاقات کی، انہوں نے بتایا کہ آفس نے توہینِ عدالت کی درخواست پر یہ اعتراض لگایا ہے کہ توہین کے مرتکب افراد کو الزامات کی لسٹ ارسال نہیں کی گئی۔

(جاری ہے)

اس ضمن میں پاکستان تحریک انساف کے چیئرمین نے مزید واضح کیا کہ قانونی ٹیم اعتراضات کو فوری طور پر دور کر رہی ہے اور توہینِ عدالت کی یہ درخواست تمام ضروری دستاویزات کے ساتھ آج ہی دوبارہ سپریم کورٹ میں دائر کر دی جائے گی۔