عالمی ریکارڈ بنانے کیلئے بولر نے 100 کلو میٹر دوڑ کر گیند کروائی

جمعہ 4 ستمبر 2026 22:37

لندن(اُردو پوائنٹ اخبارتازہ ترین - این این آئی۔ 04 ستمبر2026ء) برطانیہ میں ایک کلب کرکٹر نے عالمی ریکارڈ بنانے کے لیے 100 کلو میٹر سے زائد فاصلے تک دوڑ کر گیند کروائی۔سام بوڈوانو نامی کرکٹر نے لندن میں واقع لارڈز اسٹیڈیم سے دوڑنا شروع کیا اور سرے میں جاکر گیند کروائی۔ 22 سالہ کرکٹر نے 62 میل سے زائد کا فاصلہ 14 گھنٹے 6 منٹ میں مکمل کیا۔

(جاری ہے)

30اگست کو کرکٹر نے یہ گیند کروائی اور اسے گینز ورلڈ ریکارڈ کا حصہ بنانے کے لیے 14 گھنٹے سے زائد وقت تک گیند کو ہاتھ میں تھامے رکھا جبکہ اس دوران وہ مکمل وائٹ کرکٹ یونیفارم بھی پہنے رہا اور پہلی گیند کروانے کے بعد بھی کرکٹ میچ کو مکمل کیا۔

سام بوڈوانو نے یہ گیند اپنے والد کو کروائی جنہوں نے اسے کور کی جانب کھیلا مگر کوئی رن نہیں بنا،سام بوڈوانو نے بتایا کہ وہ 7 سال کی عمر سے کرکٹ کھیل رہا ہے اور دوڑ کے دوران گیند کو تھامے رکھنا بہت مشکل محسوس ہوا،اس دوڑ کا مقصد عالمی ریکارڈ بنانے کے ساتھ ساتھ ایک فلاحی ادارے کے لیے 6 ہزار پانڈ سے زائد رقم کو اکٹھا کرنا بھی تھا۔گنیز ورلڈ ریکارڈ میں یہ اعزاز ایک ایسے فرد کے نام ہے جس نے اگست 2024 میں 15 میل دوڑ کر گیند کروائی تھی۔