طالب علموں کو پہلی مرتبہ سپورٹس بورڈ پنجاب ایڈوائزری بورڈ میں شامل کرلیا گیا

لاہور (اُردو پوائنٹ اخبارتازہ ترین - آن لائن۔ 04 ستمبر2026ء) صوبائی وزیر کھیل فیصل ایوب کھوکھر کی زیرصدارت سپورٹس بورڈ پنجاب کے ایڈوائزری بورڈ کا اہم اجلاس منعقد ہوا، جس میں ڈائریکٹرجنرل سپورٹس پنجاب محمد طارق قریشی ، ڈپٹی ڈائریکٹر ظہور احمدودیگر افسران اور ایڈوائزری بورڈ کے ارکان نے شرکت کی۔ صوبائی وزیر کھیل پنجاب ملک فیصل ایوب کھوکھر نے اجلاس سے خطاب کرتے ہوئے کہا ہے کہ پاکستان میں پہلی مرتبہ کسی سرکاری ادارے کے ایڈوائزری بورڈ میں طالبعلموں کو ممبرز بنایا گیا ہے، نوجوان اب کھیلوں کی پالیسی سازی اور فیصلہ سازی میں براہِ راست کردار ادا کریں گے، ایڈوائزری بورڈ کے تمام ارکان کو فیصلہ سازی میں مکمل اختیار حاصل ہوگا اور ایڈوائزری بورڈ کے تمام اراکین کو محکمہ کھیل کی متعلقہ کمیٹیوں میں بھی شامل کیا جائے گا، سپورٹس بورڈ پنجاب کا ایڈوائزری بورڈ ایک سال کی مدت کے لیے قائم کیا گیا ہے،صوبائی وزیر کھیل پنجاب ملک فیصل ایو ب کھوکھر نے مزید کہا ہے کہ کالجز اور یونیورسٹیز میں سپورٹس کوٹہ پر سختی سے عملدرآمد کرایا جائے گا جبکہ پرائیویٹ یونیورسٹیوں میں بھی سپورٹس کوٹہ سسٹم پر عملدرآمد یقینی بنایا جائے گا، اس حوالے سے طالبعلموں اور کھلاڑیوں کی شکایات کے ازالے کے لیے باقاعدہ شکایت سیل بھی بنایا جائے گا، حکومت پنجاب نوجوانوں کو کھیلوں کے میدان میں آگے بڑھنے کے بھرپور مواقع فراہم کررہی ہے،نوجوانوں کو پالیسی سازی میں شامل کرنے کا مقصد ان کی آواز کو مؤثر بنانا اور کھیلوں کے مستقبل کے حوالے سے ان کی تجاویز سے استفادہ کرنا ہے، وزیرکھیل پنجاب ملک فیصل ایوب کھوکھر نے کہا کہ ستمبر سے نومبر تک یوتھ گیمز کے ذریعے گنیز بک آف ورلڈ ریکارڈ قائم کرنے کا ہدف رکھا گیا ہے۔

(جاری ہے)

پنجاب میں پہلی مرتبہ سپورٹس سٹی کا قیام عمل میں لایا جارہا ہے، جہاں ایک ہی چھت کے نیچے کھیلوں کی تمام جدید سہولیات فراہم کی جائیں گی،سپورٹس سٹی میں کھیلوں کی سہولیات کے ساتھ انٹرٹینمنٹ اور دیگر جدید سہولیات بھی فراہم کی جائیں گی تاکہ نوجوانوں کو ایک جامع اور بہترین ماحول میسر آسکے۔ ایڈوائزری بورڈ میں بختاور ابراہیم (جی سی یونیورسٹی)، آئمہ ابرار اور بلال احسن (یو ای ٹی)، ، غلام اکبر اور عیشا سحر (کنگ ایڈورڈ میڈیکل یونیورسٹی)، رانیہ امین اور حمزہ رحمن عابد (کامسیٹس)، جویریہ فاطمہ اور محمد حسین (یو سی پی)،ملک ایان ابرار (العلیم میڈیکل کالج) جبکہ عروبہ،طاہرہ سلیم، عرفان علی ، حسنین کھوکھر،عمار بلال کو شامل کیا گیا ہے۔