مجوزہ قومی ای فائلنگ نظام کی بنیادی صارف بار ہے، عملی تجاویز سے نظام کو موثر اور آسان بنایا جا سکتا ہے، چیف جسٹس یحییٰ آفریدی

اسلام آباد (اُردو پوائنٹ اخبارتازہ ترین - اے پی پی۔ 04 ستمبر2026ء) چیف جسٹس پاکستان جسٹس یحییٰ آفریدی نے کہا ہے کہ بار مجوزہ قومی ای فائلنگ فریم ورک کی بنیادی صارف ہے، اس لیے اس کی تیاری اور کامیاب نفاذ میں وکلاء برادری کلیدی شراکت دار ہے، بار کی عملی تجاویز سے نظام کو موثر، قابل رسائی اور استعمال میں آسان بنایا جا سکتا ہے۔سپریم کورٹ کے شعبہ تعلقات عامہ کے جاری اعلامیہ کے مطابق انہوں نے ان خیالات کا اظہار قومی جوڈیشل پالیسی ساز کمیٹی (این جے پی ایم سی) کے چیئرمین کی حیثیت سے پنجاب بار کونسل اور اسلام آباد بار کونسل کے نمائندوں کے ساتھ سپریم کورٹ میں منعقدہ مشاورتی اجلاس کی صدارت کرتے ہوئے کیا۔

چیف جسٹس نے کہا کہ بار کونسلز کی عملی آراء اور تجاویز کو مجوزہ معیاری ای فائلنگ ٹیمپلیٹس کی تیاری میں شامل کیا جائے تاکہ یہ نظام عدالتی کارروائیوں سے متعلق قانونی طریقہ کار کی ضروریات کے مطابق موثر اور صارف دوست ہو۔

(جاری ہے)

اجلاس قومی سطح پر سپریم کورٹ، ہائیکورٹس اور ضلعی عدالتوں میں ای فائلنگ کے لیے یکساں اور معیاری فریم ورک کی تیاری کے حوالے سے جاری مشاورتی عمل کا حصہ تھا۔

اجلاس کے شرکا کو مجوزہ قومی معیاری ای فائلنگ نظام کے بارے میں بریفنگ دی گئی۔ بتایا گیا کہ یہ ایک منظم، ذہین اور قواعد و ضوابط سے ہم آہنگ پلیٹ فارم ہوگا جو عدالتی کارروائیوں کی قانونی اور طریقہ کار کی ضروریات کے مطابق کام کرے گا۔اجلاس میں بتایا گیا کہ قومی معیاری ای فائلنگ نظام عدالتی اصلاحات کے وسیع تر ایجنڈے کا حصہ ہے جس کا مقصد ٹیکنالوجی کے ذریعے عدالتی امور کو جدید بنانا، کارکردگی اور شفافیت میں اضافہ، مقدمات کے عمل کو مزید قابل پیش بینی بنانا اور سائلین و وکلاء کے لیے انصاف تک رسائی کو آسان اور موثر بنانا ہے۔

پنجاب بار کونسل اور اسلام آباد بار کونسل کے نمائندوں نے قومی ای فائلنگ نظام کے اقدام کا خیرمقدم کیا اور معیاری ٹیمپلیٹس، الیکٹرانک عدالتی ریکارڈ، دستاویزات کی ڈیجیٹل جمع کرانے، مقدمات کی نگرانی، تکنیکی معاونت و تربیت، ڈیجیٹل انفراسٹرکچر اور ڈیٹا سکیورٹی سے متعلق تجاویز پیش کیں۔اجلاس میں فیصلہ کیا گیا کہ تمام ہائیکورٹس کے رجسٹرارز، ہر صوبائی بار کونسل کے دو، دو نامزد ارکان اور اسلام آباد بار کونسل کے دو نامزد ارکان پر مشتمل کمیٹی معیاری ای فائلنگ ٹیمپلیٹس کا جائزہ لے کر انہیں حتمی شکل دے گی۔

حتمی شکل دیئے جانے کے بعد ای فائلنگ ٹیمپلیٹس قومی جوڈیشل پالیسی ساز کمیٹی کے سامنے غور اور پالیسی ہدایات کے لیے پیش کیے جائیں گے۔اجلاس میں پنجاب بار کونسل کے ارکان فخر حیات اعوان، فیصل ملک، چوہدری قیصر مشتاق اور شاہد محمود عباسی جبکہ اسلام آباد بار کونسل کے وائس چیئرمین چوہدری آصف عرفان، ایگزیکٹو کمیٹی کے چیئرمین محمد ظفر کھوکھر، ڈسپلنری کمیٹی کے چیئرمین راجہ ایم علیم خان عباسی، رکن چوہدری حفیظ اللہ یعقوب اور رکن عبدالرحمن ہور باجوہ نے شرکت کی۔ پنجاب بار کونسل کے چیئرمین ایگزیکٹو کمیٹی چوہدری ارشد علی ہنجرا نے بذریعہ زوم اجلاس میں شرکت کی۔