Live Updates

پیٹرول اور ڈیزل کی قیمتوں میں ردوبدل کا نوٹیفکیشن جاری

پیٹرول 3 روپے 13 پیسے کمی جبکہ ڈیزل 3 روپے 74 پیسے فی لیٹر مہنگا کردیا گیا

ثنااللہ ناگرہ جمعہ 4 ستمبر 2026 23:05

پیٹرول اور ڈیزل کی قیمتوں میں ردوبدل کا نوٹیفکیشن جاری

اسلام آباد ( اردوپوائنٹ اخبار تازہ ترین ۔ انٹرنیشنل پریس ایجنسی ۔ 04 ستمبر 2026ء ) اوگرا نے پیٹرولیم مصنوعات کی قیمتوں میں ردوبدل کا اعلان کردیا ہے۔ پیٹرولیم ڈویژن کے جاری کردہ نوٹیفکیشن کے مطابق پیٹرول کی قیمت میں 3 روپے 13 پیسے کمی جبکہ ڈیزل کی قیمت میں 3 روپے 74 پیسے فی لیٹر اضافہ کردیا گیا۔ پیٹرول کی نئی قیمت 345 روپے 87 پیسے اور ڈیزل کی قیمت 378 روپے 5 پیسے مقرر کردی گئی۔

نئی قیمتوں کا اطلاق آج رات 12 بجے سے ہوگا۔ دوسری جانب اوپن مارکیٹ میں مہنگائی کا سلسلہ برقرار ہے، گھی، خوردنی تیل، چاول اور چینی سمیت بنیادی اشیائے خورونوش کی قیمتوں میں اضافے نے شہریوں خصوصاً سفید پوش طبقے کی مشکلات بڑھا دی ہیں۔مارکیٹ ذرائع کے مطابق کراچی میں گھی کی قیمت 490 سے بڑھ کر 520 روپے فی کلو تک پہنچ گئی ہے، جبکہ مختلف اقسام کے چاول 320 سے 520 روپے فی کلو میں فروخت ہو رہے ہیں۔

(جاری ہے)

اسی طرح چینی کی قیمت بھی بڑھ کر 160 سے 165 روپے فی کلو تک پہنچ گئی ہے، جس کے باعث روزمرہ استعمال کی بنیادی اشیاء کی خریداری عام صارفین کیلئے مزید مشکل ہوگئی ہے۔ شہریوں نے بتایا کہ اشیائے خورونوش کی قیمتوں میں مسلسل اضافے کے مقابلے میں آمدن میں خاطرخواہ اضافہ نہیں ہوا، جس کے باعث گھریلو اخراجات پورے کرنا مشکل ہوتا جا رہا ہے۔

صارفین نے حکومت اور متعلقہ انتظامیہ سے مطالبہ کیا ہے کہ مارکیٹ میں قیمتوں کی مؤثر نگرانی کی جائے، مصنوعی مہنگائی اور ناجائز منافع خوری کا سدباب کیا جائے اور عوام کو بنیادی اشیائے خورونوش مناسب نرخوں پر فراہم کرنے کیلئے عملی اقدامات کیے جائیں۔