شیری رحمان کا پاکستان میں بچوں کے خلاف بڑھتے زیادتی کے کیسز پر تشویش کا اظہار

جمعہ 11 ستمبر 2026 19:20

ْ اسلام آبا د(اُردو پوائنٹ اخبارتازہ ترین - این این آئی۔ 11 ستمبر2026ء) نائب صدر پیپلز پارٹی سینیٹر شیری رحمان نے پاکستان میں بچوں کے خلاف بڑھتے زیادتی کے کیسز پر تشویش کا اظہار کرتے ہوئے کہا ہے کہ جنوری تا جون 2026 میں بچوں کے خلاف 1914 کیسز کا رپورٹ ہونا ہمارے لیے لمحہ فکریہ ہے،بچوں کا تحفظ ریاست اور معاشرے دونوں کی مشترکہ ذمہ داری ہے، والدین کو بھی اپنے اردگرد مشکوک افراد پر کڑی نظر رکھنا ہوگی۔

اپنے بیان میں شیری رحمن نے کہاکہ پنجاب سے 80 فیصد کیسز کا آنا ثابت کرتا ہے کہ وہاں بچوں کے تحفظ کا نظام مکمل ناکام ہے۔ انہوںنے کہاکہ 43فیصد ملزمان کا متاثرہ بچوں کا واقف کار ہونا ثابت کرتا ہے کہ مسلہ گھروں سخت نگرانی کا نہ ہونا بھی ہے ،تقریباً 45 فیصد واقعات کا بچوں کے اپنے گھروں میں پیش آنا سب سے زیادہ افسوسناک ہے، ہمیں گھریلو ماحول کو محفوظ بنانا ہوگا۔

(جاری ہے)

شیری رحمان نے کہاکہ 57 فیصد کیسز شہری اور 43 فیصد دیہی علاقوں سے رپورٹ ہوئے، یہ مسئلہ پورے معاشرے کا ہے کسی ایک طبقے کا نہیں۔ شیری رحمن نے کہاکہ 89 فیصد کیسز کا پولیس میں درج ہونا اچھا ہے لیکن اندراج کے ساتھ فوری تفتیش اور بروقت کارروائی بھی ضروری ہے۔ شیری رحمن نے کہاکہ بچوں سے زیادتی کے ملزمان کسی رعایت کے مستحق نہیں، ہر کیس کو مثال بنایا جائے اور ملزمان کو عبرت ناک سزا دی جائے۔

شیری رحمن نے کہاکہ اعلیٰ عدلیہ سے گزارش ہے کہ بچوں کے خلاف سنگین جرائم کے مقدمات کا فوری ٹرائل کر کے انصاف میں تاخیر ختم کی جائے۔ انہوںنے کہاکہ بچوں کا تحفظ ریاست اور معاشرے دونوں کی مشترکہ ذمہ داری ہے، والدین کو بھی اپنے اردگرد مشکوک افراد پر کڑی نظر رکھنا ہوگی۔ انہوںنے کہاکہ اگر ہم ریاست کے طور پر اپنے معصوم بچوں کو بنیادی حق تحفظ نہیں دے سکتے تو یہ نظام کی سب سے بڑی ناکامی ہے جسے فوری ٹھیک کرنا ہوگا۔