یہ تاثر غلط ہے میرے پاس پاسپورٹ ہی نہیں تھا، رضا اللہ

ماں باپ کی دعائوں کا نتیجہ ہے کہ مجھے پاکستان کی نمائندگی کا موقع ملا، گفتگو

ہفتہ 12 ستمبر 2026 22:49

برمنگھم (اُردو پوائنٹ اخبارتازہ ترین - این این آئی۔ 12 ستمبر2026ء) برمنگھم کے ایجبسٹن کرکٹ گرانڈ پر تیسرے ٹیسٹ کے تیسرے دن انگلینڈ کے خلاف نویں نمبر پر 63 گیندوں پر 4 چوکوں اور 9 چھکوں کے ساتھ طوفانی 81 رنز کی اننگز کھیلنے والے دائیں ہاتھ کے جارح مزاج بلے باز رضا اللہ نے کہاہے کہ اس بات میں کوئی صداقت نہیں کہ ان کا پاسپورٹ نہیں بنا ہوا تھا اور جب انھیں انگلینڈ طلب کیا گیا تو بورڈ نے ہنگا می بنیادوں پر ان کا پاسپورٹ بنوایا۔

اپر دیر میں پیدا ہونیوالے نوجوان فاسٹ بولر جو قائد اعظم ٹرافی پشاور ریجن کیلئے کھیلے، انہوںنے کہاکہ ایک سال قبل ان کا پاسپورٹ بن گیا تھا اور وہ جاپان میں ہونیوالے ایشین گیمز کی تیاری کر رہے تھے، جب انھیں لاہور میں واقع پی سی بی کے ہائی پرفارمنس سینٹر میں بتایا گیا کہ وہ انگلینڈ جا رہے ہیں۔

(جاری ہے)

رضا اللہ نے کہا کہ ماں باپ کی دعائوں کا نتیجہ ہے کہ مجھے پاکستان کی نمائندگی کا موقع ملا اور وہ اللہ تعالیٰ کا شکر ادا کرتے ہیں کہ دوسری اننگز میں انگلینڈ کے بولرز کے خلاف رنز بنانے میں کامیاب رہے۔

فاسٹ بولر رضا اللہ نے کہا کہ وہ فرسٹ کلاس کرکٹ میں اننگز اوپن بھی کر چکے ہیں،21 سال کے دائیں ہاتھ کے تیز بولر نے کہا کہ انھیں انگلش بولرز کو اٹیک کر کے بلے باز ی کر نے میں لطف آیا، جب ان سے سوال ہوا کہ انھوں نے کوچ سے اوپری نمبروں پر بیٹنگ میں جا نے کیلئے کہا، تو مسکراتے ہوئے بولے یہ میرا پہلا ٹیسٹ ہے، میں ایسا کیسے کر سکتا تھالیکن اب اعتماد ملا ہے، کوچ نے مجھے بیٹنگ کرتے دیکھا بھی ہے، مستقبل میں ضرور ایسا سوچوں گا اور ضرورت محسوس ہوئی تو کوچ سے بات بھی کروں گا۔

رضا اللہ نے ایجبسٹن ٹیسٹ کی دوسری اننگز میں اوپنر شان مسعود ، اذان اویس اور کپتان بابر اعظم کے بعد اننگز میں پاکستان کیلئے چوتھی نصف سینچری اسکور کی تھی اور فاسٹ بولر محمد عباس کے ساتھ نویں وکٹ پر 121 رنز جوڑ کر نا صرف پاکستان کو اننگز کی شکست سے محفوظ رکھا، بلکہ دوسری اننگز میں انگلینڈ کو 130 رنز کا ہدف دینے میں مرکزی کردار ادا کیا تھا، جہاں محمد عباس نے کیرئیر کی بیسٹ 42 رنز کی اننگز کھیلی تھی۔