’’یواین ‘‘جنرل اسمبلی سے صدر اردوان کے خطاب سے کشمیریوں کے حوصلے بلند ہوئے ہیں، ڈی ایف پی

ترکی مستقبل میں بھی کشمیری عوام کے حقِ خودارادیت اور مسئلہ کشمیر کے منصفانہ حل کے لیے اپنی آواز مؤثر انداز میں بلند کرتا رہے گا

جمعرات 24 ستمبر 2026 16:43

سری نگر(اُردو پوائنٹ اخبارتازہ ترین - این این آئی۔ 24 ستمبر2026ء) بھارت کے غیر قانونی زیر قبضہ جموں وکشمیر میں ’’ ڈیموکریٹک فریڈم پارٹی ‘‘(ڈی ایف پی) نے اقوام متحدہ کے فورم پر مقبوضہ جموں و کشمیر کے عوام کے حقِ خودارادیت اور مسئلہ کشمیر کے منصفانہ حل کے لیے آواز بلند کرنے پر ترکیہ کے صدر رجب طیب اردوان کا کشمیری عوام کی جانب سے دلی شکریہ ادا کیا ہے۔

کشمیر میڈیاسروس کے مطابق ڈیموکریٹک فریڈم پارٹی کے ترجمان ایڈووکیٹ ارشد اقبال نے سرینگر میں جاری اپنے ایک بیان میں کہا کہ صدر اردوان کی جانب سے عالمی سطح پر مسئلہ کشمیر اور کشمیری عوام کے جائز حق کو اجاگر کرنا کشمیریوں کے لیے انتہائی حوصلہ افزا ہے ۔ انہوں نے کہا کہ کشمیری عوام ترکیہ کی اس سیاسی اور سفارتی حمایت کو قدر کی نگاہ سے دیکھتے ہیں اور امید کرتے ہیں کہ وہ مستقبل میں بھی کشمیری عوام کے حقِ خودارادیت اور مسئلہ کشمیر کے منصفانہ حل کے لیے اپنی آواز مؤثر انداز میں بلند کرتا رہے گا۔

(جاری ہے)

ترجمان نے پاکستان کے وزیر خارجہ محمد اسحاق ڈار کا بھی شکریہ ادا کیا کہ انہوں نے او آئی سی کے کشمیر رابطہ گروپ کے اجلاس میں مسئلہ کشمیر کو مؤثر اور مضبوط انداز میں پیش کیا۔ انہوں نے کہا کہ پاکستان مسئلہ کشمیر کا ایک اہم فریق ہے جو کشمیری عوام کی آواز کو عالمی سطح پر اجاگر کرنے اور مسئلے کے سیاسی و سفارتی حل کے لیے اپنی ذمہ داری بھرپور انداز میں ادا کر رہا ہے۔

ایڈووکیٹ ارشد اقبال نے کہا کہ او آئی سی جیسے اہم اسلامی سفارتی پلیٹ فارم پر مسئلہ کشمیر کو تسلسل کے ساتھ اجاگر کرنا اس امر کی یاد دہانی ہے کہ کشمیری عوام کی جدوجہد اور ان کے حقِ خودارادیت کا مسئلہ محض ایک علاقائی معاملہ نہیں بلکہ ایک دیرینہ بین الاقوامی مسئلہ ہے، جس کے حل کے لیے عالمی برادری، بالخصوص اقوام متحدہ، کو اپنی ذمہ داریاں ادا کرنا ہوں گی۔انہوں نے واضح کیا کہ مسئلہ کشمیر کا پائیدار حل اقوام متحدہ کی پاس کر دہ قراردادوں اور کشمیری عوام کی امنگوں کے مطابق ہی ممکن ہے۔