بین الاقوامی اسلامی یونیورسٹی میں پانی کے تحفظ، آبی سلامتی اور پائیدار آبی انتظام کے حوالے سے سیمینار کا انعقاد

جمعہ 25 ستمبر 2026 16:12

اسلام آباد (اُردو پوائنٹ اخبارتازہ ترین - اے پی پی۔ 25 ستمبر2026ء) بین الاقوامی اسلامی یونیورسٹی اسلام آباد میں پانی کے تحفظ، آبی سلامتی اور پائیدار آبی انتظام کے حوالے سے سیمینار منعقد ہوا ،جس کا مقصد پاکستان میں پانی کے تحفظ کے لئے شعور اجاگر کرنے کے ساتھ ساتھ عملی اقدامات کی حوصلہ افزائی کرنا تھا۔ ’’پانی کی قلت سے آبی سلامتی تک: پاکستان کی تحفظِ آب حکمت عملی اور پائیدار اقدامات‘‘ کے عنوان سے منعقدہ سیمینار کا اہتمام شعبہ بین الاقوامی تعلقات اور شعبہ عمرانیات نے ’’ہم ہیں پاکستان‘‘ اقدام کے تحت کیا۔

یہ سرگرمی اقوام متحدہ کے پائیدار ترقی کے اہداف کے بارے میں آگاہی اور عملی شمولیت کے لئے جامعہ کی جاری کوششوں کا حصہ تھی۔ اس موقع پر شعبہ بین الاقوامی تعلقات و سیاسیات کی پروفیسر اور جامعہ میں پائیدار ترقی کے اہداف کی فوکل پرسن ڈاکٹر نور فاطمہ نے پاکستان کے لئے آبی سلامتی کی بڑھتی ہوئی اہمیت پر روشنی ڈالی۔

(جاری ہے)

انہوں نے کہا کہ پانی کے تحفظ کے حوالے سے محض آگاہی تک محدود رہنے کے بجائے عملی اور اجتماعی اقدامات کی ضرورت ہے جبکہ طلبہ کو پانی کے ذمہ دارانہ استعمال میں اپنا کردار ادا کرنے پر بھی زور دیا۔

شعبہ عمرانیات کی ڈاکٹر عنبر فردوس اور ڈاکٹر سائرہ نے پاکستان کو درپیش آبی مسائل، پانی کے تحفظ کی حکمت عملیوں اور پائیدار اقدامات پر اظہار خیال کیا۔ انہوں نے پائیدار ترقی کے ہدف 6، صاف پانی اور نکاسی آب، پر خصوصی توجہ دیتے ہوئے آبی سلامتی اور موسمیاتی اقدامات، پائیدار شہروں اور آبادیوں، معیاری تعلیم اور اہداف کے حصول کے لئے شراکت داری سمیت دیگر پائیدار ترقی کے اہداف کے باہمی تعلق کو بھی اجاگر کیا۔

مقررین نے شرکاء پر زور دیا کہ وہ پانی کے ذمہ دارانہ استعمال کو اپنی روزمرہ زندگی کا حصہ بنائیں اور پائیدار مستقبل کے لئے اپنا کردار ادا کریں۔ انہوں نے کہا کہ انفرادی اور ادارہ جاتی سطح پر کئے جانے والے چھوٹے مگر اجتماعی اقدامات پانی کے تحفظ اور پائیداری کے فروغ میں نمایاں کردار ادا کر سکتے ہیں۔ سیمینار جامعہ کی جانب سے پائیدار ترقی کے اہداف کو آگاہی، کمیونٹی شمولیت اور عملی اقدامات کے ذریعے فروغ دینے کی وسیع تر کوششوں کا حصہ ہے۔