بھارت کیخلاف ڈٹ جانے پر سابق کرکٹرز کی حسن نواز کی تعریف

حسن نواز نے کیا ہی شاندار اننگز کھیلی،شاہدآفریدی…حکمت عملی کی کچھ غلطیاں اچھی کوششوں پر پانی پھیر دیتی ہیں،محمد حفیظ

پیر 5 اکتوبر 2026 14:49

بھارت کیخلاف ڈٹ جانے پر سابق کرکٹرز کی حسن نواز کی تعریف

لاہور(اُردو پوائنٹ اخبارتازہ ترین - این این آئی۔ 05 اکتوبر2026ء) بھارت کے خلاف ایشینز گیمز کے فائنل میں نوجوان حسن نواز کی شاندار بیٹنگ کو سابق اور موجودہ کھلاڑیوں کی جانب سے بھرپور سراہا گیا۔سابق کپتان شاہد آفریدی، محمد یوسف اور محمد حفیظ نے حسن نواز کی بھارت کے خلاف مزاحمت اور آخر تک ڈٹے رہنے کی تعریف کی ہے تاہم سابق کپتان محمد حفیظ نے ایشین گیمز 2026 کے فائنل کے دوران کیے گئے حکمت عملی کے فیصلوں پر تنقید کرتے ہوئے کہا ہے کہ کئی غلطیوں نے ٹیم کی مجموعی طور پر قابلِ ستائش کوششوں کو گہنا دیا۔

حفیظ نے سوشل میڈیا پلیٹ فارم ایکس پر حکمت عملی کی غلطیوں کی نشاندہی کرتے ہوئے کہا کہ ایسی غلطیوں کو اکثر تسلیم نہیں کیا جاتاجبکہ انہوں نے نوجوان بلے باز حسن نواز کی شاندار بیٹنگ کی تعریف بھی کی۔

(جاری ہے)

حفیظ نے لکھا کہ کھیل کے دوران حکمت عملی کی کچھ غلطیاں کئی اچھی کوششوں پر پانی پھیر دیتی ہیں،مجھے یقین ہے کہ ہمیشہ کی طرح کوئی بھی ان غلطیوں کو تسلیم نہیں کریگا اور اسی وجہ سے ہم بطور ٹیم وہیں رک گئے۔

اس کے باوجود، انتہائی باصلاحیت حسن نواز کی جانب سے شاندار بیٹنگ کا مظاہرہ کیا گیا۔سابق کپتان شاہد آفریدی نے حسن نواز کی اننگز کی تعریف کی اور ایکس پر لکھا کہ حسن نواز نے کیا ہی شاندار اننگز کھیلی، یہ واقعی اعلیٰ معیار کی اور ہر لحاظ سے گولڈ میڈل کے قابل اننگز تھی۔انہوں نے لکھا کہ لڑکوں! ہمت نہ ہارنا آپ کا مقابلہ کرنے کا انداز بہت پسند آیا۔

محمد یوسف نے آفریدی کے خیالات کی تائید کی اور بھارت کے خلاف نواز کی کارکردگی کو ’’مضبوط‘‘قرار دیا۔یوسف نے لکھا کہ حسن نواز نے زبردست کارکردگی کا مظاہرہ کیا اور بین الاقوامی کرکٹ میں اپنے گزشتہ تسلسل کو برقرار رکھا، پاکستان نے کامیابی کے حصول کے لیے مختلف پہلوؤں سے مثبت پیش رفت کی ہے۔بھارتی ٹیم نے ٹاس جیت کر پہلے بیٹنگ کا فیصلہ کیا اور مقررہ اوورز میں پاکستان کو جیت کے لیے 212 رنز کا پہاڑ جیسا ہدف دیا۔

ہدف کے تعاقب میں پاکستان ٹیم مقررہ اوورز میں 192 رنز بنا سکی۔ حسن نواز کی 96 رنز کی شاندار اننگز بھی ٹیم کو فتح نہ دلا سکی۔ دیگر بیٹرز میں صائم 29، معاذ 23، فرحان 10، عبدالصمد 9 اور عثمان 3 رنز بنا سکے۔ اس طرح بھارت نے فائنل معرکہ سر کر کے ایشین گیمز کا گولڈ میڈل اپنے نام کیا۔