Live Updates

امریکا پر بے اعتمادی کے سبب مذاکرات کا کوئی فائدہ نہیں، مسعود پزشکیان

منگل 6 اکتوبر 2026 12:04

تہران (اُردو پوائنٹ اخبارتازہ ترین - این این آئی۔ 06 اکتوبر2026ء) ایران کے صدر مسعود پزشکیان نے کہا ہے کہ امریکا پر بے اعتمادی کے سبب اس سے مذاکرات کا کوئی فائدہ نہیں، امریکا کا ہدف ایران حکومت کا تختہ الٹنا ہے۔ایرانی میڈیا کے مطابق آرمینیا کے وزیر خارجہ ارارات مرزویان نے ایران کے صدر مسعود پزشکیان سے تہران میں ملاقات کی۔اس موقع پر ایرانی صدر کا کہنا تھا کہ جب بھی ایران مذاکرات کی میز پر آیا اسے فوری طور پر جنگ کا سامنا کرنا پڑا۔

ان کا کہنا تھا کہ مذاکرات کے بعد تین بار ایران پر حملے کیے جاچکے ہیں جو اس بات کا اظہار ہے کہ امریکا کو ڈائیلاگ میں دلچسپی نہیں۔صدر پزشکیان نے کہا کہ ایسا دشمن جو ہر روز قتل، پابندیوں، دباو، دھمکانے اور وعدے توڑنے والا ہو اس سے مذاکرات بے معنی ہیں۔

(جاری ہے)

ایران کے اسپیکر محمد باقر قالیباف نے کہا کہ قفقاز کو جیو پولیٹیکل دشمنی کا میدان نہیں بننا چاہیے۔

قالیباف نے خلیج فارس کی صورتحال کی طرف اشارہ کرتے ہوئے کہا کہ تجربے سے ثابت ہوا ہے کہ غیرعلاقائی طاقتوں کی مداخلت سے عدم تحفظ بڑھتا ہے۔آرمینیا کے وزیر خارجہ نے یقین دہانی کرائی کہ انکا ملک اپنی سرزمین ایران کے خلاف استعمال ہونے نہیں دے گا۔ارارات مرزویان نے کہا کہ علاقائی ممالک کی موجودہ سرحدوں کا تحفظ کرنا آرمینیا کے لیے بھی بے حد اہم ہے۔