وزیراعلیٰ مریم نوازشریف کی ہدایت پرسی ایم انسپکشن ٹیم کا ڈاکٹر فیصل مسعود ٹیچنگ ہسپتال سرگودھا کا اچانک دورہ

منگل 6 اکتوبر 2026 22:26

ًلاہور (اُردو پوائنٹ اخبارتازہ ترین - آن لائن۔ 06 اکتوبر2026ء) وزیراعلیٰ مریم نواز شریف کی ہدایت پر معاون خصوصی شعیب مرزا کی سربراہی میںسی ایم انسپکشن ٹیم نے ڈاکٹر فیصل مسعود ٹیچنگ ہسپتال سرگودھا کا اچانک دورہ کیا۔ سرگودھا ہسپتال میں طبی سہولیات، صفائی اور انتظامی امور کا جائزہ لیا گیا۔ سی ایم انسپکشن ٹیم نے ہسپتال کے مختلف شعبہ جات کا تفصیلی معائنہ کیا۔

وزیراعلیٰ مریم نواز شریف کے معاون خصوصی شعیب مرزا نے سرگودھا ہسپتال میں خراب اے سی اور سٹریچرز کی صورتحال پر فوری اقدامات کی ہدایت کی۔

(جاری ہے)

اس موقع پرمریضوں کو فراہم کی جانے والی طبی سہولیات، صفائی ستھرائی اور دیگر انتظامات کا بھی جائزہ لیا گیا۔معاون خصوصی شعیب مرزا نے ہسپتال کے دو اے سی کی خرابی کی پر متعلقہ عملے کی جانب سے بروقت اطلاع نہ دینے پر برہمی کا اظہارکیا اور خراب اے سی فوری طور پر درست کرانے جبکہ ذمہ دار اہلکاروں کو شوکاز نوٹس جاری کرنے کی ہدایت کی۔

سی ایم انسپکشن ٹیم نے ہسپتال میں اسٹریچر کی فوری طور پر کمی پوری کرنے اور خراب سٹریچرز کو درست کرانے کے احکامات بھی جاری کیے۔ معاون خصوصی شعیب مرزا نے کہا کہ مریضوں کو طبی سہولیات کی فراہمی میں غفلت برداشت نہیں کی جائے گی۔