میرکل اسلحے کی برآمد بند ، مہاجرین کی مدد کریں، جرمن سیاست دان

دہشت گردی کے خلاف جنگ گزشتہ سولہ برس سے جاری مگردنیا آج بھی غیر محفوظ ہے ،انٹرویو

پیر 22 مئی 2017 11:58

برلن(اُردو پوائنٹ اخبار آن لائن۔ منگل 23 مئی 2017ء)بائیں بازو کی جرمن سیاسی جماعت ’دی لِنکے‘ کی سربراہ نے کہاہے کہ جرمنی تنازعات کے شکار ممالک میں اسلحے کی برآمد بند کر دے اور مہاجرین اور ان ممالک کی سکیورٹی اور تعمیر و ترقی کے لیے زیادہ امداد فراہم کرے۔ جرمن حکومت اسلحے کی برآمدات ختم کر دے۔جرمن ریڈیو کو دیئے گئے ایک انٹرویومیں انہوں نے کہاکہ جرمنی کو خانہ جنگی اور تنازعات کے شکار ممالک کی بہتر سکیورٹی اور طویل المدتی تعمیر و ترقی کے منصوبوں کے لیے زیادہ سے زیادہ مالی امداد فراہم کرنی چاہیے۔

کِپِنگ کا کہنا تھا کہ دہشت گردی کے خلاف جنگ گزشتہ سولہ برس سے جاری ہے لیکن اس کے باوجود دنیا آج بھی محفوظ نہیں ہے بلکہ دنیا بھر میں تشدد اور بنیاد پرستی میں اضافہ ہوا ہے۔

(جاری ہے)

دی لِنکے کی چیئرپرسن کے مطابق بموں کے ذریعے لوگوں کا مستقبل بہتر نہیں بنایا جا سکتا اور نہ ہی جنگوں سے جمہوریت پروان چڑھتی ہے۔ انہوں نے دہشت گرد تنظیم ’اسلامک اسٹیٹ‘ کے حوالے سے کہا کہ اس تنظیم کا وجود میں آنا ایک واضح مثال ہے کہ ’جنگ اور مداخلت کا نتیجہ عسکریت پسندی میں اضافے کے صورت میں سامنے آتا ہے۔

بائیں بازو کی اس جرمن سیاست دان کا یہ بھی کہنا تھا کہ ان کی جماعت عالمی بحرانوں کو یکجہتی اور کشیدگی میں کمی کے ذریعے حل کرنے پر یقین رکھتی ہے۔ کِپِنگ کے مطابق،بحرانی وقتوں میں پہلے کی طرح ہی کام جاری رکھنے اور اس کی رفتار بڑھا دینے سے مسئلہ حل نہیں ہوتا۔ اس کی بجائے یورپ میں مہاجرین کا بحران یکجہتی کے ذریعے حل کیا جانا چاہیے۔بائیں بازو کی اس جرمن سیاسی جماعت کی سربراہ نے یورپی یونین کی اقتصادی پالیسیوں میں بھی اصلاحات کا مطالبہ کیا اور کہا کہ یونین کی اقتصادی پالیسی مقابلے کی بجائے توازن پر مبنی ہونا چاہیے۔ انہوں نے وطن پرستی، عوامیت پسندی اور انفرادی سوچ کی پالیسی کو ناقابل قبول قرار دیا۔