پارٹی انتخابات،ترک صدردوبارہ اپنی جماعت آق کے سربراہ منتخب

میں آج اپنی پارٹی،اپنے گھر اور اپنی محبت کی طرف لوٹ آیا ہوں،جیت کے بعد ایردوآن کا خطاب ْ

پیر 22 مئی 2017 11:58

انقرہ (اُردو پوائنٹ اخبار آن لائن۔ منگل 23 مئی 2017ء)ترکی کی حکمراں جماعت ’انصاف وترقی‘(آق) نے پارٹی قیادت کے چناؤ کے لیے ہونے والے انتخابات میں صدر طیب ایردوآن کو جماعت کا دوبارہ سربراہ منتخب کرلیا۔عرب ٹی وی کے مطابق آق کے ایک اہم عہدیدار نے بتایا کہ اگست 2014ء ایردوآن نے جماعت کی قیادت اپنے ہاتھ میں لیے رکھی تھی تاہم اس کے بعد پچھلے تین سال وہ پارٹی کے صدر نہیں تھے۔

تاہم کل اتوار کے روز انہیں دوبارہ جماعت کا سربراہ منتخب کرلیا گیا ہے۔پچھلے تین سال کے دوران پارٹی قیادت موجودہ وزیراعظم بن علی یلدرم کے ہاتھ میں تھی۔ تاہم حالیہ پارٹی قیادت کے انتخابات میں جماعت کی سربراہی کے لیے ایردوآن کے مقابلے میں دوسرا کوئی امید وار نہیں تھا۔

(جاری ہے)

وہ بلا مقابلہ جماعت کے صدر منتخب ہوئے ہیں۔صدر ایردوآن نے پارٹی کی قیادت ایک ایسے وقت میں دوبارہ اپنے ہاتھ میں لی ہے جب گذشتہ اپریل میں ہونے والے ایک عوامی ریفرنڈم میں انہوں نے ملک میں پارلیمانی کیبجائے صدارتی نظام کی داغ بیل ڈالی تمام اختیارات حاصل کرلیے ہیں۔

جماعت کے نائب صدر ھایاتی یازدجی نے بتایا کہ پارٹی انتخابات میں ایردوآن نے 1414 ووٹ حاصل کیے ہیں۔ انقرہ اسٹیڈیم میں ہونے والے انتخابات میں ایردوآن کو پارٹی سربراہ منتخب ہونے پر کارکنان کی خوشی دیدنی تھی۔اس موقع پر صدر ایردوآن نے خطاب کرتے ہوئے کہا کہ یہ مخصوص کانفرنس جس میں 1470 ارکان جماعت کو مدعو کیا گیا تھا نئے ترکی کا نقطہ آغاز ہے۔

انہوں نے کہا کہ پیش آئند چند مہینوں کے دوران دہشت گردی کے خلاف جنگ، اقتصادی ترقی، شہری حقوق، بنیادی شہری آزادیوں اور سرمایہ کاری سمیت کئی دیگر شعبوں میں ترکی تیزی کیساتھ آگے بڑھے گا۔خیال رہے کہ اگست 2014 کو ملک کا صدر منتخب ہونے کے بعد ایردوآن کو پارٹی کی قیادت چھوڑنا پڑی تھی۔ حال ہی میں دستور میں ترمیم کیبعد انہوں نے پارٹی قیادت دوبارہ اپنے ہاتھ میں لینے کی راہ ہموار کرلی تھی جسے انہوں نے دیگر قائدین کے ساتھ مل کر 2001ئ میں قائم کیا تھا۔اپنے تاثرات بیان کرتے ہوئے صدر ایردوآن نے کہا کہ میں آج اپنی پارٹی،اپنے گھر اور اپنی محبت کی طرف لوٹ آیا ہوں۔