مسابقتی کمیشن نے فارماسیوٹیکل شعبہ میں 6 معاہدوں کی اجازت دیدی

اسلام آباد (اُردو پوائنٹ اخبارتازہ ترین - اے پی پی۔ 05 جون2025ء) مسابقتی کمیشن آف پاکستان نے فارماسیوٹیکل شعبے میں جدت کے فروغ اور صارفین کی فلاح کے پیش نظر شعبے میں چھ فارماسیوٹیکل کمپنیوں کو مسابقتی ایکٹ کی مارکیٹ میں جغرافیائی کوٹہ سے متعلق شقوں سے استثنیٰ دیتے ہوئے معاہدوں کی اجازت دے دی ہے۔مسابقتی ایکٹ کے سیکشن 5 کے تحت دیئے گئے استثنیٰ (ایگزیمپشن) کمپنیوں کے کمرشل معاہدوں میں پائی جانے والی ایسی شقوں سے متعلق ہیں جو کہ مسابقتی ایکٹ کے سیکشن 4 کے تحت عموماً غیرمسابقتی تصور کی جاسکتی ہیں تاہم مسابقتی کمیشن نے مارکیٹ انفراسٹرکچر، قواعد و ضوابط اور معاہدوں میں درج تجارتی شرائط کے تفصیلی جائزہ کے بعد قرار دیا ہے کہ ان معاہدوں سے کمپنیوں کی پیداواری و تکنیکی کارکردگی بہتر اور صارفین کی فارماسیوٹیکل مصنوعات تک رسائی میں اضافہ متوقع ہے۔

(جاری ہے)

کمیشن نے کہا ہے کہ تجارتی معاہدوں کو استثنیٰ ملنے سے خدمات کی فراہمی بہتر ہو گی، غیر محفوظ علاقوں میں ادویات کی دستیابی میں اضافہ ہوگا اور یہ معاہدے صحت عامہ کے لئے مفید ثابت ہوں گے۔ مزید برآں صارفین کو جدید فارماسیوٹیکل ٹیکنالوجی تک رسائی، قابل اعتماد مصنوعات کی معلومات اور سروس کے اعلیٰ معیارات حاصل ہوں گے۔یہ بات قابل ذکر ہے کہ مسابقتی کمیشن کی جانب سے ہر معاہدے کو ایک مخصوص مدت تک کے لئے اس شرط پر چھوٹ دی گئی ہے کہ ان سے حاصل ہونے والے فوائد مسابقت پر اثرانداز نہیں ہوں گے جبکہ کمپنیوں کو واضح کیا گیا ہے کہ وہ اس استثنیٰ کو بنیاد بنا کر کسی بھی قسم کے گٹھ جوڑ اور قیمتوں کا تعین کرنے یا دیگر غیر مسابقتی سرگرمیوں میں ملوث ہونے سے باز رہیں۔

واضح رہے کہ مسابقتی کمیشن فارماسیوٹیکل شعبہ کو ایگزیمشنز کے لئے ایک ترجیحی سیکٹر تصور کرتا ہے اور وسیع تر عوامی مفاد کے لیے متعلقہ ریگولیٹرز کے ساتھ مشاورت کے ساتھ میرٹ پر فیصلہ کرتا ہے۔