مقامی صنعت کو فروغ دینے کے لیے قیمتی جواہرات اور زیورات کی نمائش کا آغاز ہو گیا

اسلام آباد (اُردو پوائنٹ اخبارتازہ ترین - اے پی پی۔ 15 جون2025ء) مقامی پیداوار کے فروغ اور برآمدات بڑھانے کے مقصد سے یہاں جواہرات اور زیورات کی دو روزہ نمائش کا آغاز ہوگیا، جس میں قیمتی پتھروں کے خزانے اور نفیس زیورات کی نمائش کی گئی۔ صوبائی وزیر سید ریاض حسین شاہ شیرازی نے پاکستان جیمز اینڈ جولری ڈویلپمنٹ کمپنی (پی جے ڈی سی)کے زیر اہتمام اس نمائش کا باقاعدہ افتتاح کیا۔

یہاں جاری پریس ریلیز کے مطابق صوبائی وزیر نے کہا کہ یہ نمائش مقامی نمائش کنندگان کو جواہرات اور زیورات کی مصنوعات کی مختلف اقسام کو پیش کرنے کا ایک منافع بخش پلیٹ فارم مہیا کرے گی، جن میں قیمتی اور نیم قیمتی پتھر، معدنی نمونے اور عمدہ زیورات (سونے، سفید گولڈ، چاندی کے) اور جواہرات سے جڑے زیورات شامل ہیں۔

(جاری ہے)

انہوں نے سفارتکاروں، غیر ملکی معزز شخصیات اور دیگر شرکا پر زور دیا کہ وہ اس نمائش سے فائدہ اٹھائیں، کیونکہ یہ خریداروں اور فروخت کنندگان کے لیے مواقع کی ایک بہترین کھڑکی ہوگی اور جواہرات اور زیورات کے تاجروں، برآمد کنندگان اور درآمد کنندگان کے لیے ایک دوسرے کے ساتھ روابط قائم کرنے کے لیے سازگار ماحول فراہم کرے گی۔

پی جے ڈی سی کے چیف ایگزیکٹو آفیسر محمد عالمگیر چوہدری نے ملک میں جواہرات اور زیورات کی اصل صلاحیت کو اجاگر کیا اور بتایا کہ اس نمائش کا مقصد پاکستانی جواہرات اور زیورات کے شعبے اور کاروباری برادری کے درمیان تفہیم کو فروغ دینا ہے تاکہ بی ٹو بی روابط کو مضبوط بنایا جا سکے۔ انہوں نے اعتماد کا اظہار کیا کہ یہ نمائش کاروباری ترقی کو بڑھانے میں اہم کردار ادا کرے گی۔

انہوں نے مزید کہا کہ اس نمائش کا انعقاد کمپنی کی جانب سے اپنی سرگرمیوں کو دوبارہ شروع کرنے کی جانب ایک اہم قدم ہے اور یہ پاکستان میں اس صنعت کی ترقی کے لیے حکومتی عزم کا اظہار ہے۔ انہوں نے اس شعبے کے تجارت اور برآمدات کو آسان بنانے کے لیے حکومت کی جانب سے اٹھائے گئے اقدامات پر بھی روشنی ڈالی۔ انہوں نے بتایا کہ حکومت نے ایس آر او 760(I)/2013 کا جائزہ لینے کے لیے ایک کمیٹی تشکیل دی ہے تاکہ اس کے دوبارہ نافذ ہونے سے پہلے اس کی رکاوٹوں کو دور کیا جا سکے۔

افتتاحی تقریب میں حکومتی اہلکاروں، سفارتکاروں بشمول تھائی لینڈ، سری لنکا، متحدہ عرب امارات، عمان، انڈونیشیا، بنگلہ دیش کے قونصل جنرلز اور چیمبرز آف کامرس، جواہرات اور زیورات کی ایسوسی ایشنز کے نمائندوں اور معروف تاجروں نے شرکت کی، جن میں اے آر وائی جیولرز، موتی والا جیولرز، ہلٹن جیولرز، حامد جیولرز، عربین جیولرز، این ایم چھوتانی جیولرز، گولڈن آرٹس شامل ہیں۔

اس موقع پر معروف جواہرات اور زیورات کے تاجروں اور برآمد کنندگان نے اپنے قیمتی پتھروں کے خزانے اور نفیس زیورات کی نمائش کی گئی۔ ان میں نیو ایرا جیولرز، ہیریٹیج جیولرز، بلالز (دی ڈائمنڈ اسٹور ، سید جیولرز، دی ایمرالڈ رائل کمپنی، حسین سنز جیولری (طاریق روڈ)، نادیہ چھوتانی ڈیزائنر جیولری، ہارون جیولرز، روزاری اور گیلیکسی جیمولوجیکل انسٹی ٹیوٹ شامل ہیں۔

تقریب کے شرکا نے کہا کہ یہ نمائش اس شعبے کی ترقی اور جواہرات و زیورات کی برآمدات کو بڑھانے کے لیے وزارت صنعت و پیداوار اور پی جے ڈی سی کی جانب سے اٹھایا گیا ایک مثبت قدم ہے اور یہ پاکستان کے جواہرات و زیورات کے شعبے کے لیے ایک دوسرے کے ساتھ روابط قائم کرنے اور طویل المدت اور قلیل المدت کاروباری معاہدوں میں داخل ہونے کا پلیٹ فارم ثابت ہوگا۔ انہوں نے مزید کہا کہ یہ نمائش یقینی طور پر پاکستان کے جواہرات و زیورات کے شعبے کی اصل صلاحیت کو اجاگر کرنے میں مدد دے گی۔