معیاری بیجوں کی تیاری کیلئے دستیاب وسائل کوبروئے کار لایا جارہا ہے‘ علی ارشد رانا

تحقیقی اداروں کے ساتھ اشتراک کو فروغ دیا گیا ہے ‘ مینیجنگ ڈائریکٹر پنجاب سیڈ کارپوریشن

اتوار 15 جون 2025 11:55

لاہور(اُردو پوائنٹ اخبارتازہ ترین - این این آئی۔ 15 جون2025ء) مینیجنگ ڈائریکٹر پنجاب سیڈ کارپوریشن علی ارشد رانا نے کہا ہے کہ فی ایکٹر زیادہ پیداوار کے حصول کیلئے معیاری بیجوں کی فراہمی اور جعلی زرعی ادویات کی روک تھام کے ساتھ کسانوں کی نئے رجحانات کے مطابق تربیت بھی نا گزیر ہے ،جدید ٹیکنالوجی اور ریسرچ کے ذریعے معیاری بیجوں کی تیاری کے لئے دستیاب وسائل کو بھرپور طریقے سے بروئے کار لایا جارہا ہے ۔

اپنے بیان میں انہوں نے کہا کہ ہمارا یہ ہدف ہے کہ ہم نے پنجاب سیڈ کارپوریشن کو انوویشن کے ذریعے کارپوریٹ طرز پر ترقی دے کر اپنے پائوں پر کھڑا کرنا ہے جس کے لئے عملی پیشرفت جاری ہے ۔اس کے ساتھ کسانوں کی رہنمائی پر بھی بھر پو ر توجہ دی گئی ہے اور انہیں بدلتے رجحانات سے آگاہ کیا جارہا ہے ۔

(جاری ہے)

پنجاب سیڈ کارپوریشن کسانوں کو سمارٹ ایگری کلچر، ڈرون ٹیکنالوجی سمیت اس طرز کی دیگر تکنیک سے روشناس کرانے کے لئے پر عزم ہے ۔

انہوں نے کہا کہ پنجاب سیڈ کارپوریشن نے تحقیقی اداروں کے ساتھ اشتراک کو فروغ دیا ہے تاکہ مختلف اجناس گندم، کپاس، دھان، مکئی ، دالوں ،سبزیوں اور چارہ جات کے ایسے اقسام کے بیج تیار کیے جا سکیں جو نہ صرف زیادہ پیداوار دیں بلکہ موسمی تبدیلیوں اور بیماریوں کے خلاف بھی قوت مدافعت رکھتے ہوں۔انہوں نے کہا کہ ہم کسان تنظیموں کو بھی دعوت دے رہے ہیں کہ وہ فیلڈ میں تربیتی ورکشاپس اور ڈیجیٹل پلیٹ فارمز کے ذریعے آگاہی مہمات میں ہمارے ساتھ اشتراک کریں تاکہ صوبے کا کسان ہر طرح کی تبدیلی سے با خبر رہتے ہوئے زراعت کی ترقی میں اپنا کردار ادا کرے ۔