پی آئی اے نے سی اے اے پاکستان سے جی ایچ او سی گرائونڈ ہینڈلنگ آپریٹر سرٹیفکیٹ حاصل کر کے ایک اور سنگ میل عبور کر لیا‘ قومی ایئر لائن کے ترجمان عبداللہ خان کی طرف سے جاری اعلامیہ

پیر 28 ستمبر 2020 23:55

اسلام آباد ۔ (اُردو پوائنٹ اخبارتازہ ترین - اے پی پی۔ 28 ستمبر2020ء) قومی ایئر لائن (پی آئی ای) نے سی اے اے پاکستان سے جی ایچ او سی گرائونڈ ہینڈلنگ آپریٹر سرٹیفکیٹ حاصل کر کے ایک اور سنگ میل عبور کر لیا۔ قومی ایئر لائن کے ترجمان عبداللہ خان کی طرف سے جاری اعلامیہ کے مطابق پی آئی اے کے شعبہ ٹی جی ایس یا ٹیکنیکل گراؤنڈ سپورٹ ڈویژن نے سی اے اے پاکستان سے جی ایچ او سی گرائونڈ ہینڈلنگ آپریٹر سرٹیفکیٹ حاصل کر لیا۔

(جاری ہے)

اس سرٹیفکیشن سے پی آئی اے کو آپریٹر کی حیثیت سے دوسرے غیر ملکی کیریئر کو بھی اپنی خدمات پیش کرنے کا موقع ملے گا۔ ایئر لائنز ہیڈ آفس میں سی ای او پی آئی اے ، ایئر مارشل ارشد ملک کو یہ سرٹیفکیٹ پیش کیا گیا۔ پی آئی اے کو سرٹیفکیشن کی منظوری ٹی جی ایس کے اس امر کی ضامن ہے کہ پی آئی اے اعلیٰ بین الاقوامی معیار پر پورا اترتی ہے۔ پی آئی اے ٹیکنیکل گراؤنڈ سپورٹ میں دیگر ایئر لائنز کو گراؤنڈ ہینڈلنگ خدمات مہیا کرنے کے تمام تر آلات اور مہارت حاصل ہے اور وہ ایئر لائن کے لئے اضافی آمدنی کا ذریعہ بن سکتی ہے۔ سی ای او پی آئی اے ایئر مارشل ارشد ملک نے جنرل منیجر آغا سمیع کی سربراہی میں ٹی جی ایس ٹیم کو اس سلسلے میں مبارکباد پیش کی۔