فواد اور ماہرہ کی فلم’’مولا جٹ2‘‘ اگلے سال عید الفطر پر ریلیز ہوگی

کراچی (اُردو پوائنٹ اخبارتازہ ترین - این این آئی۔ 10 دسمبر2018ء) فواد خان اور ماہرہ خان کی اکھٹی پہلی فلم’’ مولا جٹ 2‘‘ اگلے سال عید الفطر کے موقع پر ریلیز کی جائے گی۔پاکستانی فلم وار کے ہدایتکار بلال لاشاری کی اس فلم کا ٹائٹل بھی سامنے آگیا ہے جو کہ ’’دی لیجنڈ آف مولا جٹ‘‘ ہے۔ہدایتکار بلال لاشاری نے اپنے سوشل میڈیا پیج پر فلم کے پہلی جھلک یا پوسٹر کو ریلیز کرتے ہوئے تاریخ کا اعلان کیا۔

یہ فلم اگلے سال عید الفطر کے موقع پر ریلیز کی جائے گی۔خیال رہے کہ اس فلم کی تیاری پر کافی عرصے سے کام ہورہا تھا مگر کچھ عرصے پہلے 1979 کی مولا جٹ کے پروڈیوسر نے بلال لاشاری اور ان کی ٹیم پر کاپی رائٹس کی خلاف ورزی کا الزام عائد کیا تھا۔فلم ’مولا جٹ‘ کے پروڈیوسر محمد سرور بھٹی نے بلال لاشاری اور معروف مصنف ناصر ادیب پر الزام لگایا کہ ان دونوں نے انہیں ’گمراہ‘ کیا، اور ساتھ میں یہ بھی دعویٰ کیا کہ ان کی فلم ’مولا جٹ‘ کو دوبارہ بنانے کے رائٹس کبھی کسی کو فروخت کیے ہی نہیں گئے۔

(جاری ہے)

اپنے نوٹس میں محمد سرور بھٹی نے فلم کی کاسٹ ماہرہ خان، فواد خان، حمزہ علی عباسی اور حمیمہ ملک کو خبردار کیا کہ ’وہ اس پروجیکٹ سے دور رہیں اور جلد سے جلد ایسی غیر قانونی طور ہر بننے والی فلم سے خود کو علیحدہ کرلیں۔تاہم اب لگتا ہے کہ 1979 کی سپرہٹ فلم کے اس ری میک کو درپیش مسائل حل ہوگئے ہیں، جب ہی اس کا پہلا پوسٹر اور ریلیز کی تاریخ کا اعلان ہوا ہے۔

اس فلم میں علی عظمت اور گوہر رشید بھی اہم کرداروں میں نظر آئیں گے۔فلم میں فواد خان مولا جٹ جبکہ حمزہ علی عباسی نوری نت کا کردار ادا کریں گے جبکہ ماہرہ خان مکھو جٹی کے روپ میں نظر آئیں گی۔گزشتہ سال ٹوئٹر پر ماہرہ خان نے اپنے مداحوں سے بات چیت کرتے ہوئے کہا تھا ’ہاں دوبارہ وہی جادو لانے میں بیحد محنت لگے گی، لیکن مولا جٹ 2 ہمسفر جیسی بالکل نہیں۔