ٹنل کاشتہ سبزیوں پر ضرررساں کیڑوںکے حملہ کے پیش نظرزہروں کے بروقت استعما ل بارے معلومات ہونا ضروری ہے،محکمہ زراعت

قصور۔15 اگست(اُردو پوائنٹ اخبارتازہ ترین - اے پی پی۔ 15 اگست2018ء) ترجمان محکمہ زراعت قصور نے کہا ہے کہ ٹنل میں کاشت سبزیوں پر ضرررساں کیڑوں اوربیماریوں کا حملہ نسبتاً زیادہ ہوتاہے اسلئے موثرزہروں کے بروقت استعمال کے متعلق تمام ضروری معلومات کا علم ہونا ضروری ہے۔ ترجمان کیمطابق ٹنل میں کاشت سبزیوں پرلیف مائنرکا حملہ بھی زیادہ ہوتاہے‘ ٹنل میں جڑی بوٹیوں کی تلفی کیلئے کالے رنگ کی پلاسٹک شیٹ استعمال کی جائے تو گوڈی کے مقابلے میں بہترنتائج ملتے ہیں اس پلاسٹک شیٹ کو بطور ملچنگ استعمال نہ کیاجائے تو جڑی بوٹیوں کی تلفی کیلئے بہت زیاد ہ محنت کرنی پڑتی ہے جس سے پیداواری اخراجات میں اضافہ ہوجاتاہے‘ پلاسٹک ٹنل میں تمام کاشتکار جڑی بوٹی مارزہریں استعمال نہیں کرتے۔

ترجمان نے مزیدکہا کہ ٹنل میں جڑی بوٹی مارودیگر کیمیائی زہروں کے استعمال کیلئے بھی خصوصی تربیت حاصل کرناضروری ہے‘ٹنل کی شیٹ اتارنے سے پہلے اگلی2ہفتے تک کی موسمی صورتحال کا جائزہ لیناضروری ہے‘موسمی حالات کا شیڈول دیکھے بغیرٹنل پر لگی پلاسٹک شیٹ نہ اتاری جائے‘عام طورپر فروری کے آخری یا مارچ کے پہلے ہفتے کے دوران شیٹ اتاردی جاتی ہے لیکن کسی سال موسم جلدی گرم ہونے لگتاہے یاکسی سال سردی کا سلسہ وسط مارچ تک بھی جاری رہ سکتاہے۔

(جاری ہے)

بہارمیں موسم مکمل تبدیل ہونے پر ٹنل سے پلاسٹک شیٹ اتارنے کی سفارش کی جاتی ہے۔ پلاسٹک شیٹ تمام کھیت سے ایک دم نہ اتاری جائے بلکہ چند دن کیلئے ٹنل کو دن اور رات کے اوقات میں دونوں اطراف سے پوری طرح کھلا رکھاجائے اوربعدمیں مکمل شیٹ اتاری جائے۔