اُردو پوائنٹ پاکستان لاہورلاہور کی خبریںعمران خان مشکل لمحوں میں کمزوری کو اپنی طاقت میں تبدیل کرنے کا فن جانتا ..

عمران خان مشکل لمحوں میں کمزوری کو اپنی طاقت میں تبدیل کرنے کا فن جانتا ہے ‘ نوجوت سنگھ سدھو

پیار ،محبت اور امن کا پیغام لے کر پاکستان آیا ہوں ، کھلاڑی اور فنکار فاصلے مٹاتے ،عوام کو آپس میں جوڑتے ہیں , عمران خان کی تقریب حلف برداری میں شرکت کیلئے واہگہ کے راستے پاکستان آمد کے موقع پر گفتگو ،نظمیں بھی سنائیں

لاہور (اُردو پوائنٹ اخبارتازہ ترین۔ 17 اگست2018ء) بھارت کے سابق کرکٹر ، سیاستدان نوجوت سنگھ سدھو نے کہا ہے کہ پیار ،محبت اور امن کا پیغام لے کر پاکستان آیا ہوں ، عمران خان کو کرکٹ کے دور سے جانتا ہوں انہوں نے ہمیشہ مشکل لمحوں میں کمزوری کو اپنی طاقت میں تبدیل کیا ہے ، کھلاڑی اور فنکار فاصلے مٹاتے اور عوام کو آپس میں جوڑتے ہیں۔ ان خیالات کا اظہار انہوں نے وزیر اعظم عمران خان کی تقریب حلف برداری میں شرکت کیلئے واہگہ کے راستے پاکستان آمد کے موقع پر میڈیا سے گفتگو کرتے ہوئے کیا ۔

نوجوت سنگھ سدھو نے کہا کہ میں خود کو خوش نصیب سمجھتا ہوں کہ مجھے اتنے عظیم لمحات کا حصہ بننے کا موقع میسر آرہا ہے ۔ میں سیاسی شخصیت کے طور پر پاکستان نہیں آیا بلکہ ایک دوست کی دعوت پر امن ، پیار او ر محبت کا قاصد بن کر آیا ہوں ۔

(خبر جاری ہے)

کچھ کام سرکار کے ہوتے ہیں اور میں اس میں دخل اندازی کرنے نہیں آیا بلکہ اپنے دوست کی خوشی میں شریک ہونے آیا ہوں۔

انہوں نے کہا کہ میں عمران خان کو کرکٹ کے دور سے جانتا ہوں اوران کی شخصیت سے واقف ہوں ۔ وہ مشکل لمحوں میں کمزوری کو اپنی طاقت میں تبدیل کر جاتے تھے ، عمران خان نے چٹانوں کو اپنے لئے سیڑھی بنا یا ہے او رپاکستان کو اسی کی ضرورت ہے ۔ انہوں نے کہا کہ کھلاڑی اور فنکارچاہے وہ نصرت فتح علی خان ہوں، بڑے غلام علی خان ، وسیم اکرم ، کشور کمار یہ فاصلے مٹاتے ہیں ، یہ لوگوں کو دو رنہیں کرتے بلکہ انہیں جوڑتے ہیں ۔

نوجوت سنگھ سدھو نے مزید کہا کہ آس اور امید نہیں ٹوٹنی چاہیے او ر وقت بتائے گا کہ عمران خان اگلے چھ ماہ میں امیدوں پر پورا اترتے ہیں کہ نہیں ۔ ویسے عمران خان سونا ہے اسے جتنا آگ میں ڈالا جائے گا اس کی اوپر کی میل اترے گی اورنیچے سے مزید شاندار چیز نکلے گی ۔ اس موقع پر انہوں نے بتایا کہ میں عمران خان کیلئے کشمیری شال لے کر آیا ہوں جو انہیں تحفے کے طور پر پیش کروں گا۔ اس موقع پر نوجوت سنگھ سدھو نے عمران خان کیلئے اورپیار ، امن او رمحبت کے حوالے سے نظمیں بھی سنائیں۔

اپنی رائے کا اظہار کریں -

لاہور شہر کی مزید خبریں