بھارتی کی آبی جارحیت:ستلج، راوی اور چناب میں سیلاب‘درجنوں دیہات زیرآب آگئے‘سینکڑوں ایکڑ پر کھڑی فصلیں تباہ

لاہور(اردوپوائنٹ اخبارتازہ ترین-انٹرنیشنل پریس ایجنسی۔24 ستمبر۔2018ء) بھارت نے دریائے ستلج، راوی اور چناب میں پانی چھوڑ دیا، جس کے باعث دریاﺅں میں پانی کی سطح بلند ہونے لگی ہے جبکہ سیالکوٹ میں چہور کے مقام پر نالہ ڈیک میں طغیانی سے کئی دیہات زیر آب آگئے. بھارت کی جانب سے پانی چھوڑے جانے کے بعد نالہ ڈیک میں اونچے درجے کا سیلاب ہے، شکر گڑھ میں نالہ بئیں میں طغیانی کے بعدسینکڑوں ایکڑ فصل زیر آب آگئی.

فتح پور نیناں کوٹ روڈ پر پل ٹوٹنے سے رابطہ منقطع ہوگیا، سیلابی پانی موضع پنڈی چکڑا، ننگل، بوراڈلہ کی فصلوں میں داخل ہوگیا جب کہ بوعہ کے مقام پر نالہ ہوڈلہ میں طغیانی ہے.

(جاری ہے)

اسی طرح بالائی علاقوں میں مسلسل بارشوں سے نارووال کے ندی نالوں میں طغیانی ہے، سیلابی صورتحال کے پیش نظر محکمہ انہار نے نالہ اوج اور نالہ ڈیک کے مقام پر فلڈ واچنگ کیمپ قائم کردیے.

محکمہ انہار کا کہنا ہے کہ نالہ ڈیک میں اونچے درجے کا سیلاب ہے اور سیلابی ریلہ حفاظتی بندوں کے درمیان محفوظ طریقے سے گزر رہا ہے، ناگہانی حالات کی صورت میں ضروری مشینری اور عملہ موجود ہے. محکمہ انہار کے مطابق نالہ اوج پر سیلابی ریلہ انتہائی سیلاب کے لیول سے 3 فٹ کم پر گزر رہا ہے، جہاں موجودہ لیول 861 فٹ ریکارڈ کیا گیا ہے. دوسری جانب فلڈ کنٹرول روم کا کہنا ہے کہ ہیڈ مرالہ پر دریائے چناب میں پانی کی سطح 88 ہزار 364 کیوسک ہے اور اس وقت پانی معمول کے مطابق بہہ رہا ہے.

فلڈ کنٹروم روم کا کہنا ہے کہ دریائے جموں توی میں نچلے درجے کا سیلاب ہے جہاں پانی کی سطح 20 ہزار833 کیوسک ہے کنگرہ کے مقام پر نالہ ڈیک میں درمیانے درجے کا سیلاب ہے. ڈائریکٹر پی ڈی ایم اے ڈاکٹر خرم شہزاد کا کہنا ہے کہ دریائے راوی اور ستلج میں پانی کی صورتحال معمول پر ہے، جب کہ دریائے چناب میں بھارت میں جموں توی کے مقام پر گزشتہ رات پانی کی سطح بلند ہوئی جہاں پانی کا لیول 20 ہزار کیوسک سے بڑھ کر ایک لاکھ 20 ہزار کیوسک پہنچ گئی.

ڈائریکٹر خرم شہزاد کے مطابق دریائے چناب میں اس وقت سیلاب کا کوئی خطرہ موجود نہیں ہے صورت حال سے نمٹنے کیلئے مشینری پہنچا دی گئی ہے. دوسری جانب پنجاب کے سینئر وزیر علیم خان نے کہا ہے کہ بھارت نے آبی جارحیت کے ذریعے پاکستان کو نقصان پہنچانے کی کوشش کی ہے جس سے بعض اضلاع میں سیلاب کا خطرہ ہے. بھارت کی جانب سے پاکستانی دریاﺅں میں پانی چھوڑے جانے پر اپنے ردعمل کا اظہار کرتے ہوئے پنجاب کے سینئر وزیر نے مزید کہا کہ تمام محکموں کوممکنہ سیلابی صورت حال کے لیے تیار رہنے کی ہدایت کر دی ہے.

علیم خان نے یہ بھی کہا کہ حکومت اپنی تمام ذمے داریاں پوری کرے گی، محکمہ بلدیات ان اضلاع میں اپنے انتظامات مکمل رکھیں. واضح رہے کہ بھارت نے پاکستان کے دریائے ستلج، راوی اور چناب میں پانی چھوڑ دیا، جس سے دریاﺅں میں پانی کی سطح بلند ہونے لگی اور کئی جگہ سیلابی صورت حال پیدا ہوگئی، متعدد دیہات اور کھیت زیر آب آگئے.