ایلیٹ فورس بھی نواز اورشہبازشریف کا لگایا ہوا پودا ہے : وزیراعلیٰ پنجاب

لاہور (اُردو پوائنٹ اخبارتازہ ترین - آن لائن۔ 17 مئی2024ء) وزیراعلیٰ پنجاب مریم نواز شریف نے کہا ہے کہ ایلیٹ فورس بھی نواز شریف اور شہبازشریف کا لگایا ہوا پودا ہے۔وہ وقت دور نہیں جب پولیس پر لگے دھبے ہم دھوئیں گے ۔ آئی جی پنجاب پولیس ڈیپارٹمنٹ میں مثبت تبدیلیاں لارہے ہیں ۔ لاہور کے بیدیاں ٹریننگ سنٹر میں ایلیٹ فورس پنجاب کی پاسنگ آؤٹ پریڈ تقریب کا انعقاد کیا گیا ، وزیراعلیٰ پنجاب مریم نواز بطور مہمان خصوصی تقریب میں شریک ہوئیں۔

تقریب میں صوبائی کابینہ کے ارکان اور آئی جی پنجاب بھی شریک ہوئے جبکہ وزیراعلیٰ پنجاب نے پریڈ کا معائنہ بھی کیا۔ بعدازاں وزیراعلیٰ پنجاب مریم نواز نے ایلیٹ فورس پنجاب کی پاسنگ آؤٹ پریڈ کی تقریب سے خطاب کرتے ہوئے کہا کہ پاسنگ آؤٹ پریڈ میں شرکت کرکے جتنی آپ کے گھر والوں کو خوشی ہورہی ہے اتنی ہی خوشی مجھے بھی ہورہی ہے، 800 کامیاب بچے میرے سامنے کھڑے ہیں جن میں خواتین بھی ہیں ،کامیاب ہونیوالوں کو مبارکباد پیش کرتی ہوں۔

(جاری ہے)

انہوں نے کہاکہ مجھے بطور وزیراعلیٰ آپ کی پاسنگ آؤٹ دیکھ کرحوصلہ ملا، میں آپ ہی میں سے ہوں،آپ کی یونیفارم پہن کر ائی ہوں، یہ وردی نہیں وہ قومی خدمت ہے جو کم بیٹوں اور بیٹیوں کے نصیب میں آتی ہے۔ انہوں نے اس مسرت کا اظہار کرتے ہوے کہا کہ بہترین کارکردگی دکھانے والوں میں70 خواتین بھی شامل ہیں، جن کے لئے طرف سے کیش انعامات بھی بھجواؤں گی۔

انہوں نے کہا کہ والدین نے اپنی بچیوں پر اعتماد کیا، ملک کی خدمت کیلئے وقف کیا، ایلیٹ فورس کی بچیاں بیٹوں کے شانہ بشانہ کھڑے ہوکر اپنے فرائض انجام دیں گی۔ انہوں نے کہا کہ والدین اپنے بچوں کو شہید ہونے کیلئے میدان میں اتار دیتے ہیں، وہ کیا جذبہ ہوتا ہوگا کہ نوجوان خود کو شہادت کیلئے میدان میں اتارتا ہے، ایلیٹ فورس کے 85افسران جام شہادت نوش کرچکے ہیں، تمام فورسز کے شہدا کو خراج عقیدت پیش کرتی ہوں، قرآن کہتاہیکہ شہید زندہ ہیں۔

ا نہوں نے کہا کہ آئی جی پنجاب پولیس ڈیپارٹمنٹ میں مثبت تبدیلیاں لارہے ہیں ، آئی جی پنجاب کو یقین دلاتی ہوں وسائل میں کمی نہیں آئے گی، جو بجٹ آئی جی پنجاب کو چاہیے ہوگا ، پنجاب گورنمنٹ فراہم کرے گی، میں نے آئی جی پنجاب کو 8جدید ترین تھرمل ایمیجنگ والے کیمرے لے کر دیئے ہیں، وہ وقت دور نہیں جب پولیس پر لگے ہوئے دھبے ہم دھوئیں گے، وہ وقت دور نہیں جب لوگ گھروں میں سکون کی نیند سوئیں گے۔