گینگ ریپ،بچوں سے زیادتی اور گھریلوملازمین پر تشدد کے سدباب کیلئے موثر اقدامات،ریپ کی سزا بڑھانے کی تجویزپر غور

Y لاہور (اُردو پوائنٹ اخبارتازہ ترین - آن لائن۔ 17 مئی2024ء) وزیراعلی پنجاب مریم نوازشریف کی زیر صدارت ایلیٹ پولیس فورس ہیڈ کوارٹر کے کمیٹی روم میں اجلاس منعقد ہوا ،جس میں صوبہ بھر میں امن وامان سے متعلق امور کا جائزہ لیا گیا۔ آئی جی پنجاب نے امن وامان کی صورتحال کے بارے میں تفصیلی بریفنگ دی۔ پولیس اور پراسیکیوشن کی ڈیجیٹل مانیٹرنگ میں بہتری کے لئے اقدامات پر پیش رفت کا جائزہ لیا گیا۔

اجلاس میں ریپ کی سزا دس سے پندرہ سال تک بڑھانے کی تجویز پر غور کیا گیا۔ اجلاس میں گینگ ریپ، بچوں سے زیادتی اور گھریلو ملازمین پر تشدد کے واقعات کے سدباب کے لئے موثر اقدامات کرنے کا فیصلہ کیا گیا۔ اجلاس میں پولیس کو کوراڈ کاپٹر ڈرون اور دیگر جدید ترین ٹیکنالوجی سے لیس کرنے فنڈز کے اجرا کے لئے اصولی منظوری دی گئی۔

(جاری ہے)

پولیس افسروں کے بارے میں رپورٹ وزیر اعلیٰ مریم نوازشریف کو پیش کر دی گئی۔

بریفنگ میں بتایا گیا کہ پولیس کیلئے سائبر کرائم انوسٹی گیشن ٹریننگ مکمل کرلی گئی۔ پولیس افسروں اور اہلکاروں کو جدید ٹیکنالوجی پر دسترس کے لئے ٹریننگ جاری ہے۔ وزیر اعلیٰ مریم نوازشریف نے کہا کہ پولیس کو پورے وسائل مہیا کریں گے،کرائم کو ہر صورت میں ختم کرنا ہے۔سینیٹر پرویز رشید، سینئر صوبائی وزیر مریم اورنگزیب، وزیر اطلاعات عظمیٰ زاہد بخاری،معاون خصوصی ذیشان ملک، ایم پی اے ثانیہ عاشق، چیف سیکرٹری، ہوم سیکرٹری، آئی جی،ایڈیشنل آئی جی اور دیگر حکام نے شرکت کی۔