سیالکوٹ سے اغوا ہونے والی ڈیڑھ سالہ بچی دبئی سے بحفاظت بازیاب، اغوا کار خاتون کو بھی گرفتار کرلیا گیا، ترجمان پولیس

لاہور (اُردو پوائنٹ اخبارتازہ ترین - اے پی پی۔ 22 مئی2024ء) پنجاب پولیس اور انٹرپول اسلام آبادنے کامیاب کارروائی کرتے ہوئے سیالکوٹ سے اغوا ہونے والی ڈیڑھ سالہ بچی کو دبئی سے بحفاظت بازیاب کروا لیا اور اغوا کار خاتون کوبھی گرفتارکر لیا ۔ ترجمان پنجاب پولیس کے مطابق انسپکٹر جنرل پولیس پنجاب ڈاکٹر عثمان انور کی ہدایت پر بیرون ملک مفرور اشتہاریوں کی گرفتاری کے لئے کریک ڈائون جاری ہے ۔

ترجمان کے مطابق لالہ موسی گجرات کی حدود میں شہری کو قتل کرکے دبئی فرار ہونے والا اشتہاری مجرم بھی پولیس کے شکنجے میں آ گیاہے۔سپیشل آپریشن سیل کی ٹیم ڈی ایس پی اسد محمود چیمہ کی قیادت میں دونوں اشتہاریوں اور بازیاب بچی کو لے کر پاکستان روانہ ہوچکی ہے۔ ترجمان پنجاب پولیس نے مزید بتایا کہ اشتہاری مجرمہ محمودہ اختر ڈیڑھ سالہ بچی میرب جاوید کو اغوا کرکے دبئی فرار ہوگئی تھی۔

(جاری ہے)

اشتہاری محمد فاروق نے 2023 ء میں لالہ موسی پولیس سٹیشن کی حدود میں شہری کو قتل کیا تھا۔پنجاب پولیس نے دونوں اشتہاریوں کے انٹر پول سے ریڈ نوٹسز جاری کروائے، مسلسل فالو اپ جاری رکھتے ہوئے بالآخر ملزم کو گرفتار کر لیا۔رواں برس بیرون ممالک سے گرفتار اشتہاری مجرمان کی مجموعی تعداد 37ہو گئی۔ آئی جی پنجاب ڈاکٹر عثمان انور نے خطرناک اشتہاریوں کو گرفتار کرنے پر آر پی او گوجرانوالہ طیب حفیظ چیمہ اور پولیس ٹیم کو شاباش دیتے ہوئے کہا کہ قانونی کارروائی جلد مکمل کرتے ہوئے ملزمان کو قرار واقعی سزا دلوائی جائے اور سنگین مقدمات میں مطلوب دیگر اشتہاریوں کی گرفتاری کیلئے کریک ڈائون کو مزید تیز کیا جائے۔