پی سی بی کے سالانہ ایوارڈز 8اگست کو منعقد ہوں گے

بہترین کارکردگی کا مظاہرہ کرنے والوں کو ایوارڈز سے نوازا جائے گا

جمعہ 3 اگست 2018 23:48

پی سی بی کے سالانہ ایوارڈز 8اگست کو منعقد ہوں گے

لاہور (اُردو پوائنٹ اخبارتازہ ترین - این این آئی۔ 03 اگست2018ء) پاکستان کرکٹ بورڈ(پی سی بی) کی سالانہ ایوارڈز کی تقریب آئندہ کراچی میں منعقد ہو گی جس میں بہترین کارکردگی کا مظاہرہ کرنے والوں کو ایوارڈز سے نوازا جائے گا۔ایوارڈ کی تقریب 8 اگست کو کراچی میں منعقدہ ہو گی جس میں قومی کرکٹرز کے ساتھ ساتھ اعلیٰ حکام بھی شریک ہوں گے۔ایوارڈز میں فخر زمان کو سب سے بڑا فیورٹ قرار دیا جا رہا ہے اور وہ بہترین بلے باز اور پلیئر آف دی ایئر ایوارڈ کے مضبوط ترین امیدوار ہیں۔

(جاری ہے)

گزشتہ سال بہترین کھیل پیش کرنے والے حسن علی کو بہترین باؤلر کے ایوارڈ کے لیے مضبوط ترین امیدوار سمجھا جا رہا ہے تاہم سب سے سخت مقابلہ بہترین آل راؤنڈر کے لیے شاداب خان اور فہیم اشرف کے درمیان ہے جہاں دونوں ہی کھلاڑیوں نے گزشتہ سال بہترین کھیل پیش کیا۔ابھرتے ہوئے بہترین کھلاڑی کے ایوارڈ کے لیے چیف سلیکٹر انضمام الحق کے بھتیجے امام الحق مضبوط امیدوار ہیں۔ایوارڈز کی تقریب میں ٹیسٹ، ون ڈے اور ٹی20 میں عمدہ کھیل پیش کرنے والوں کو مختلف کیٹیگریز میں ایوارڈ دیے جائیں گے۔