سورج کا پارہ ہائی ،بارشیں نہ ہونے سے چولستان روہی خشک سالی کا شکارہورہا

گرمیاں شروع ہوتے ہی پینے کے پانی کے ٹوبے خشک ہونا شروع ،روہی چولستان میں بسنے والوں صاف پانی کیلئے مشکلات کا سامنا

ہفتہ 25 مئی 2024 13:42

رحیم یارخان(اُردو پوائنٹ اخبارتازہ ترین - این این آئی۔ 25 مئی2024ء) سورج کا پارہ ہائی ،بارشیں نہ ہونے سے چولستان روہی خشک سالی کا شکارہورہا ہے گرمیاں شروع ہوتے ہی پینے کے پانی کے ٹوبے خشک ہونا شروع ہوگئے اور روہی چولستان میں بسنے والے لوگوں کو پینے کے صاف پانی کیلئے مشکلات کا سامنا کرنا پڑرہا ہے ۔

(جاری ہے)

تفصیلات کے مطابق تحصیل خان پور اور لیاقت پور میں بسنے والے چولستان کے علاقوں کے رہائشیوں کو ضلعی ہیڈ کوارٹر سے 70کلومیٹر دور ایک چھوٹا سا علاقہ کلر والا کھوہ سے پینے کا پانی مل رہا ہے کے ڈبلیو کے کے رہائشی نے میڈیا کو بتایا کہ بچھو والا ٹوبا اور دوسری جگہ پر پانی لے جانے کیلئے پلاسٹک کے ڈرموں کے ساتھ ان کے اونٹوں کو گھنٹوں ریتلے علاقوں میں سفر کرنا پڑتا ہے ۔

انہوںنے بتایا کہ کے ڈبلیو کے میں ایک پرانا کنواں ہے جس کے پانی کی سطح بھی کم ہوئی ہے،کنویں کا پانی نمکین ہے لیکن چولستان کے رہائشیوں کے پاس اس کے علاوہ کوئی دوسرا راستہ نہیں ہے ۔انہوںنے وزیراعلیٰ پنجاب مریم نوازشریف، وزیراعظم شہباز شریف اور چولستان ڈویلپمنٹ اتھارٹی سی ڈی اے سے بھی مطالبہ کیا ہے کہ ان علاقوں میں ٹینکروں کے ذریعہ پانی کی فراہمی اور اسے ذخیرہ کرنے کے انتظامات کیے جائیں۔