انگلینڈ کے سابق کپتان اور منیجر کیون کیگن 75 برس کی عمر میں انتقال کر گئے

لندن (اُردو پوائنٹ اخبارتازہ ترین - اے پی پی۔ 21 جولائی2026ء) انگلینڈ کی فٹ بال ٹیم کے سابق کپتان اور منیجر کیون کیگن 75 برس کی عمر میں انتقال کر گئے ۔ شنہوا کے مطابق ان کے اہل خانہ نے کیون کیگن کی موت کی تصدیق کرتے ہوئے کہا ہے کہ کیون کیگن کینسر کے عارضے میں مبتلا تھے اور انہوں نے اپنی اہلیہ اور بیٹیوں کی موجودگی میں آخری سانسیں لیں۔ کیون کیگن انگلش فٹ بال کی تاریخ کی کامیاب ترین شخصیات میں شمار ہوتے ہیں جنہوں نے بطور کھلاڑی 2 مرتبہ Ballon d'Or ایوارڈ جیتا اور انگلینڈ کی قومی ٹیم کی بطور کھلاڑی اور منیجر نمائندگی کی۔

کوچنگ میں قدم رکھنے سے قبل انہوں نے لیورپول، ہیمبرگ اور نیوکیسل یونائیٹڈ کے ساتھ بطور کھلاڑی شاندار کامیابی حاصل کی۔14 فروری 1951 کو ڈونکاسٹر کے قریب آرمتھورپ میں پیدا ہونے والے کیون کیگن نے اپنے کیریئر کا آغاز اسکنٹہورپ یونائیٹڈ سے کیا۔

(جاری ہے)

1971 میں لیورپول میں شمولیت کے بعد انہوں نے کلب کو تین فرسٹ ڈویژن ٹائٹل، 1974 کا ایف اے کپ، دو یو ای ایف اے کپ اور 1977 میں کلب کا پہلا یورپی کپ جتوانے میں اہم کردار ادا کیا۔

جرمن کلب ہیمبرگ میں ان کی منتقلی نے انہیں یورپ کے سب سے بڑے سٹارز میں شامل کر دیا، جہاں انہوں نے بنڈس لیگا ٹائٹل جیتا اور 1978 اور 1979 میں لگاتار دو بار بالون ڈی اور ( Ballon d'Or ) کا اعزاز اپنے نام کیا۔ انہوں نے انگلینڈ کے لیے 63 میچز کھیل کر 21 گولز کیے اور ٹیم کی کپتانی کے فرائض بھی انجام دیئے۔بطور منیجر 1992 میں نیوکیسل یونائیٹڈ میں واپسی پر انہوں نے ٹیم کو تنزلی سے بچایا اور ’’دی انٹرٹینرز‘‘کے نام سے ایک جارحانہ ٹیم تشکیل دی جس نے96۔

1995کے پریمیئر لیگ سیزن میں شاندار کھیل پیش کیا۔ بعد ازاں انہوں نے فلہم، مانچسٹر سٹی اور 1999 سے 2000 کے دوران انگلینڈ کی قومی ٹیم کی منیجمنٹ کے فرائض بھی سنبھالے۔ فٹ بال کے علاوہ کیون کیگن 1970 کے دہائی میں برطانیہ کی ممتاز کھیلوں کی شخصیات میں شامل رہے۔