ملک میں مون سون بارشوں کاآغاز،گہرےبادل،ٹھنڈی ہواؤں کیساتھ پھوار

اسلام آباد(اُردو پوائنٹ تازہ ترین اخبار۔1جولائی 2014ء) رحمتوں کے مہینے میں باران رحمت، ملک کے بالائی اور مشرقی علاقوں میں مون سون بارشوں کا آغاز ہوگیا۔ پنجاب کے مختلف شہروں میں گزشتہ رات بارش ہوئی جس سے موسم خوشگوار ہوگیا۔ محکمہ موسمیات نے بارشوں کا یہ سلسلہ جمعرات تک جاری رہنے کی پیش گوئی کی ہے۔ ملک بھر میں مون سون کی جھڑی لگ گئی اور بالائی علاقوں میں بادل جم کر برسے، جس سے موسم خوب خوشگوار ہوگیا۔

مون سون نے رات گئے اسلام آباد اور لاہور کا رخ کیا، تیز برسات نے ہر سمت جل تھل کردیا۔ سیالکوٹ میں بھی گزشتہ رات بارش کے بعد گرمی دبے پاوں بھاگ گئی۔

آسمان پر ہیں گہرے بادلوں کے ڈیرے سے شہریوں کے دل کا موسم بھی نکھر گیا۔ فیصل آباد میں بھی گہرے بادلوں کا راج ہے، ٹھنڈی ہوائیں بارش کا پتہ دے رہی ہیں۔

(جاری ہے)

ملتان میں بھی بادلوں نے برسنے کی تیاری کرلی۔

محکمہ موسمیات نے کل شام تک بارش کی پیش گوئی کی ہے۔

سندھ کے بالائی علاقوں میں بھی مون سون کا آغاز ہوگيا، تاہم موسم کا حال بتانے والے کہتے ہیں بارشیں معمول سے کم ہوں گی۔ گزشتہ روز سب سے زیادہ بارش منڈی بہاؤ الدین میں سڑسٹھ ملی میٹر ریکارڈ کی گئی۔ سیالکوٹ باون ،اسلام آباد اڑتیس ،مالم جبہ اکیس، لاہور سولہ، گجرات سات، دیر چار، مظفرآباد تین ، راولپنڈی اور بہاولنگر میں دو ملی میٹر بارش ہوئی۔ مون سون بارشوں کا یہ سلسلہ بالائی پنجاب، بالائی خیبر پختونخواہ اور کشمیر میں جمعرات تک جاری رہے گا۔