لاہور سمیت پنجاب بھر میں موسلادھار بارش سے سردی میں اضافہ

مری ،گلیات میں شدید برفباری کے بعد مختلف راستوں پر بدترین ٹریفک جام ،سیاح گاڑیوں میں محصور

جمعرات 1 فروری 2024 13:18

لاہور سمیت پنجاب بھر میں موسلادھار بارش سے سردی میں اضافہ

لاہور/اسلام آباد(اُردو پوائنٹ اخبارتازہ ترین - این این آئی۔ 01 فروری2024ء) لاہور سمیت پنجاب کے مختلف علاقوں میں تیز ہواوں کے ساتھ موسلا دھار بارش سے سردی کی شدت میں اضافہ ہوگیا۔لاہور کے مختلف علاقوں شملہ پہاڑی، لکشمی چوک، گوالمنڈی، قرطبہ چوک، ڈیوس روڈ، مال روڈ، اچھرہ، قینچی، چونگی امر سدھو، گجومتہ اور کاہنہ کے اطراف میں رات گئے گرج چمک کے ساتھ شروع ہونے والی بارش کا سلسلہ صبح تک جاری رہا۔

اسلامپورہ، بند روڈ، انار کلی، شالامار باغ، ماڈل ٹائون، جوہر ٹائون، گلبرگ، گارڈن ٹائون میں بھی جم کر بادل برسے۔علاوہ ازیں پنجاب کے مختلف شہروں اسلام آباد، فیصل آباد، صفدر آباد، گجرات، شرقپور شریف، جہلم، سانگلہ ہل اور منڈی بہا ئوالدین سمیت مختلف علاقے بھی بارش میں نہا گئے۔

(جاری ہے)

محکمہ موسمیات کا کہنا ہے کہ بارش کا سلسلہ وقفے وقفے سے جاری رہے گا۔

دوسری جانب آزاد کشمیر اور گلگت بلتستان کے مختلف علاقوں میں بارش اور برف باری نے جاڑے کی شدت بڑھا دی۔بالاکوٹ میں شوگران سری پائے پر پہاڑوں نے سفید چادر اوڑھ لی، جھیل سیف الملوک لولوسر پر چار فٹ تک برف باری ریکارڈ کی گئی۔مری اور گلیات میں شدید برفباری کے بعد مختلف راستوں پر بدترین ٹریفک جام سے سیاح، فیملیز اور بچے گاڑیوں میں محصور ہو کر رہ گئے، مری ایکسپریس ویاور لوئر ٹوپہ سے سہر بگلہ تک سری نگر ہائی وے پر بدترین ٹریفک جام میں کئی گاڑیاں پھنس گئیں۔شدید برفباری اور سڑکوں پر پھسلن کے باعث سیاحوں کا داخلہ بند کر دیا گیا۔