ملک کے بیشتر علاقوں میں وقفے وقفے سے بارشوں کا سلسلہ جاری ،کشمیر اور گلگت بلتستان میں برفباری

لاہور /اسلام آباد /راولپنڈی /سرگودھا /کراچی /کوئٹہ ( اُردو پوائنٹ تازہ ترین اخبار۔ 03فروی 2015ء) لاہور سمیت ملک کے بیشتر علاقوں میں وقفے وقفے سے بارشوں کا سلسلہ جاری ہے جبکہ کشمیر اور گلگت بلتستان میں برفباری سے سردی کی شدت میں مزید اضافہ ہو گیا ، لاہور میں ہلکی بارش کے باعث شہر کے 60سے زائد فیڈر ٹرپ ہونے سے متعدد علاقے بجلی سے محروم ہو گئے۔

تفصیلات کے مطابق لاہور شہر کے مختلف علاقوں میں مسلسل دوسرے روز وقفے وقفے سے بارش کا سلسلہ جاری رہا جس سے سردی کی شدت میں اضافہ ہوگیا۔ہلکی بارش سے موسم کچھ مزید سرد ضرور ہوا، تاہم یہ سردی بھی زیادہ پرلطف اور خوشگوار ہو گئی ،بارش سے شہر کی سڑکیں بھیگ گئیں،لوگوں نے بارش پڑنے پر خشک سردی سے پھیلنے والی بیماریوں سے نجات پربھی سکھ کا سانس لیا۔

(جاری ہے)

لاہور میں ہلکی بارش کا سلسلہ وقفے وقفے سے جاری ہے، بوندا باندی کے باعث شہر کے 60سے زائد فیڈر ٹرپ ہونے سے متعدد علاقے بجلی سے محروم ہو گئے۔لیسکو ذرائع کے مطابق گلبرگ، دھرمپورہ، جی ٹی روڑ، باغبان پورہ، ساہواڑی، لنک روڑ، ماڈل ٹاؤن، مغلپورہ، ہربنس پورہ، جلو، صدر، کینٹ، چاہ میراں، چونگی امرسدھو، گڑھی شاہو، راوی روڑ، داتا نگر، بھاٹی، گلشن راوی، سبزہ زار اور علامہ اقبال ٹاؤن بجلی سے محروم ہو گئے ۔

لیسکو حکام کے مطابق بارش کی وجہ سے بجلی بحالی کے کام تعطل کا شکار ہے، بارش رکتے ہی متاثرہ علاقوں میں بجلی کی فراہمی بحال کر دی جائیگی۔اسی طرح ملک بھر کے بیشتر علاقوں میں وقفے وقفے سے بارشوں کا سلسلہ جاری رہنے سے سردی کی شدت میں اضافہ ریکارڈ کیا گیا ہے ۔محکمہ موسمیات کے مطابق آئندہ چوبیس گھنٹوں کے دوران اسلام آباد گلگت بلتستان اور کشمیر میں اکثر مقامات جبکہ خیبر پختونخوا اور جنوبی پنجاب میں کہیں کہیں بارش کا امکان ظاہر کیا ہے ۔

جبکہ پنجاب میں اسلام آباد ،راولپنڈی، سروگدھا ، فیصل آباد ، ساہیوال اور گوجرانوالا ڈویژن ، جنوبی پنجاب میں ملتان ، بہاولپور ، ڈی جی خان ڈویژن ، سبی ، نصیر آباد ، کراچی ، سکھراور لاڑکانہ میں بعض علاقوں میں بارش کا امکان ہے جبکہ کشمیر، گلگت بلتستان اور خیبر پختونخوا میں پہاڑوں پر مزید برفباری کی بھی توقع ہے ۔ جمعرات تک بلوچستان، بالائی سندھ، پنجاب اور خیبر پختونخوا کے بیشتر شہر سرد ہواوں کی لپیٹ میں رہیں گے ۔ محکمہ موسمیات کے مطابق سب سے زیادہ سردی پاراچنار میں پڑی،گزشتہ روز سب سے کم درجہ حرارت قبائلی علاقے پاراچنار میں منفی 10ڈگری سینٹی گریڈ رکارڈ کیا گیا۔