آئندہ 2 روز میں ملک کے بیشترعلاقوں میں موسم خشک رہے گا

اسلام آباد(اُردو پوائنٹ اخبار تازہ ترین۔ 16اپریل۔2015ء) آئندہ 2 روز میں ملک کے بیشترعلاقوں میں موسم خشک رہے گا۔تاہم کشمیر، گلگت بلتستان، راولپنڈی، مالاکنڈ، ہزارہ ڈویڑن میں چند مقامات پر گرج چمک کیساتھ مزید بارش کا امکان ہے جبکہ ملکہ کوہسار مری میں گزشتہ روز سے کبھی تیز اور کبھی ہلکی بارش جاری ہے اور مالاکنڈ ڈویڑن میں گہرے بادلوں کا راج ہے۔

محکمہ موسمیات کے مطابق پنجاب اور خیبرپختونخوا میں بارشوں کی پیش گوئی کردی ہے۔ مری میں گزشتہ روز سے وقفے وقفے سے بارش کا سلسلہ جاری ہے جس کے بعد سردی کی شدت بڑھ گئی ہے۔گزشتہ روز کی ڑالہ باری کے باعث سیب اور آلو بخارے اور ناشپاتی کے باغات کو نقصان پہنچا ہے۔بجلی کا نظام بھی بری طرح متاثر ہے۔ہزارہ ڈویڑن کے بیشتر علاقوں میں رات بھر بارش کے بعد گہرے بادل چھائے ہوئے ہیں۔

(جاری ہے)

محکمہ موسمیات کے مطابق آئندہ 2 روز میں مالاکنڈ، پشاور، راولپنڈی ڈویڑن، اسلام آباد، فاٹا، گلگت بلتستان، کشمیر میں کہیں کہیں جبکہ کوہاٹ، بنوں، گوجرانوالہ، سرگودھااور لاہور ڈویڑن میں چند مقامات پر گرج چمک کے ساتھ بارش کا امکان ہے۔ ملک کے جنوبی علاقوں جنوبی پنجاب، سندھ اور جنوبی بلوچستان میں آئندہ چند روز کے دوران موسم خشک اور گرمی کی شدت برقرار رہے گی۔ لسبیلا42، لاڑکانہ، شہید بینظیر آباد، سکھر، چھور، کراچی، تربت41، دادو، پڈعیدن، موہنجوداڑو، جیکب آباد اوررحیم یار خان 40 ڈگری سینٹی گریڈ درجہ حرارت ریکارڈ کیے گئے۔