مون سون بارشوں کا سلسلہ عید کے دنوں میں بھی جاری رہے گا محکمہ موسمیات

اسلام آباد (اُردو پوائنٹ تازہ ترین اخبار۔5 جولائی- 2016ء) محکمہ موسمیات نے ملک کے بالائی اور کچھ وسطی علاقوں میں رواں ہفتے جاری مون سون بارشوں کا سلسلہ عید کے دنوں میں جاری رہے گا بدھ سے جمعہ کے دوران پنجاب، اسلام آباد، خیبرپختونخوا، فاٹا اور کشمیر میں کہیں کہیں تیز ہواؤں آندھی اور گرج چمک کیساتھ بارش کا امکان ہے۔ اس دوران پہاڑی علاقوں میں سیلاب آنے کا خطرہ ہے۔

ملک کے شمالی علاقوں میں مطلع جزوی طور پر ابر آلود رہنے کے علاوہ اگلے 3 روز کے دوران گرج چمک کیساتھ بارش کی توقع ہے۔ترجمان محمد فاروق کے مطابق ملک کے بیشتر علاقوں میں موسم دن کے دوران گرم اور مرطوب رہے گاتاہم مالاکنڈ، ہزارہ، مردان، پشاور، کوہاٹ، راولپنڈی، گوجرانوالہ، سرگودھا، لاہور، فیصل آباد ڈویژن، فاٹا، اسلام آباد، گلگت بلتستان اور کشمیر میں کہیں کہیں تیز ہواؤں آندھی اور گرج چمک کیساتھ بارش کا امکان ہے۔

(جاری ہے)

انہوں نے بتایا کہ آئندہ 48گھنٹوں کے دوران اسلام آباد، راولپنڈی، گوجرانوالہ، لاہور، سرگودھا، فیصل آباد ، مالاکنڈ، ہزارہ، پشاور، مردان، کوہاٹ ڈویژن، کشمیر (مظفرآباد، میرپور، پونچھ ڈویڑن)، فاٹا میں کہیں کہیں جبکہ ڈی جی خان، ملتان، بنوں اور ڈی آئی خان ڈویڑن میں بھی چند مقامات پر تیز ہواؤں آندھی اور گرج چمک کیساتھ بارش ملک کے دیگر علاقوں میں موسم گرم اور مرطوب رہے گا۔

محمد فاروق نے بتایا کہ گزشتہ 24گھنٹوں کے دوران ملک کے بیشتر علاقوں میں موسم گرم اور مرطوب رہا تاہم مالاکنڈ، ہزارہ، راولپنڈی ڈویژن اور کشمیر میں چند مقامات پر تیز ہواؤں اور گرج چمک کیساتھ بارش ہوئی۔ سب سے زیادہ بارش خیبرپختونخوا کے علاقوں میں دیر 02، کاکول01، کشمیر کے اضلاع مظفرآباد02، کوٹلی01 ، پنجاب کے شہر مری01 ملی میٹر ریکارڈ کی گئی۔