محکمہ موسمیات کی زیادہ بارشوں کی پیشگوئی کی وجہ سے کپاس کی فصل کیلئے برقت حفاظتی اقدامات نہایت ضروری ہیں، محکمہ زراعت

لاہور۔2 اگست(اُردو پوائنٹ اخبارتازہ ترین - اے پی پی۔02 اگست۔2016ء)محکمہ زراعت پنجاب نے کہا ہے کہ محکمہ موسمیات نے رواں سال میں زیادہ بارشوں کی پیش گوئی کی جس کی وجہ سے کپاس کی فصل کیلئے برقت حفاظتی اقدامات نہایت ضروری ہیں۔محکمہ زراعت پنجاب کے ترجمان نے منگل کواے پی پی کو بتایاکہ زیادہ مقدار میں غیر ضروری بارشیں فصل کی پیداوار پر منفی اثرات مرتب کرتی ہیں ، انہوں نے کاشتکاروں کو ہدایت کی کہ بارش کا پانی کپاس کے کھیت میں 24 گھنٹے سے زیادہ دیر تک جمع نہ ہونے دیں ،اس فصل کی بڑھوتری رک جاتی ہے حتیٰ کہ 48 گھنٹے پانی کھڑا رہے تو پودے مرجھانا شروع کردیتے ہیں کیونکہ کھڑے پانی میں کپاس کی جڑیں آکسیجن سے محروم ہو جاتی ہیں۔

انہوں نے کہاکہ کپاس کی فصل کو بارشوں کے کھڑے ہونے والے زائدپانی کے نقصانات سے بچانے کے لئے اور اس زائد پانی کی بروقت نکاسی کے لئے مناسب اقدامات کیے جائیں ۔

(جاری ہے)

زائد پانی کو قریبی خالی نچلے کھیت میں نکال دیا جائے ۔ اگر کپاس کے قریب دھان، کماد یا چارہ جات کی فصلیں موجود ہوں توبارشوں کا زائد پانی ان فصلوں میں پانی نکال دیا جائے ۔ انہوں نے کہاکہ اگر بارشوں کا زائد پانی کپاس کے کھیت سے باہر نہ نکالا جا سکتا ہو تو کھیت کے ایک طرف لمبائی کے رخ 2 فٹ چوڑی اور 4 فٹ گہری کھائی کھود کر پانی اس میں جمع کردیا جائے ۔

انہوں نے کہاکہ کاشتکارایسا نظام مرتب کریں جس سے کھیت میں پورا سال جڑی بوٹیاں نقصان کی معاشی حد سے تجاوز نہ کرسکیں، انہوں نے کہاکہ جری بوٹیوں کی تلفی کے لیے صرف ایک گروپ کی زہروں پر انحصار نہ کیا جائے بلکہ ہر سال مختلف طریقہ اثر والی ادویات کا سپرے کیا جائے۔ ترجمان نے مزید بتایا کہ کپاس کے کاشتکار رس چوس کیڑوں کی ہفتے میں دو بار پیسٹ سکاؤٹنگ کریں اور اگر کسی کیڑے کا حملہ نقصان کی معاشی حد سے زیادہ نظر آئے تو محکمہ زراعت پنجاب کے مقامی زرعی ماہرین کے مشورہ سے نئی کیمسٹری کا زہر استعمال کریں۔