طویل خشک سردی کے بعد ملک کے مختلف علاقوں میں باران رحمت

اسلا م آباد (اُردو پوائنٹ اخبارتازہ ترین - آن لائن۔ 03 جنوری2017ء)طویل خشک سالی کے بعد ملک میں بارشوں کا آغاز ہوگیا ۔آزاد کشمیر، چترال،سوات اور چکوال میں بارش جبکہ پشاور، اسلام آباد اور چنیوٹ میں بوندا باندی ہوئی۔نانگا پربت،بابوسرٹاپ اور بٹوگا ٹاپ پر برف باری کا سلسلہ جاری ہے جبکہ مظفرآباد کی وادی لیپہ،گریز،نیلم کے پہاڑوں اور مری میں ہلکی برف باری ہوئی ہے۔

ادھر چترال کے بالائی علاقوں میں برف باری کے بعد لواری ٹاپ ٹریفک کے لیے بند کردیا گیا۔واضح رہے کہ محکمہ موسمیات نے یہ پیش گوئی کی تھی کہ منگل سے سرما کی اچھی بارشوں کا آغاز شمالی علاقوں سے ہوگا۔محکمہ موسمیات کے مطابق چترال سے شروع ہونے والی بارشیں، پنجاب اورخیبرپختونخوا کے وسطی علاقوں تک پہنچیں گی۔

(جاری ہے)

بارشوں کا سلسلہ 4 سے 5 روز تک وقفے وقفے سے جاری رہے گا۔

خشک موسم سے متاثرہ فصلوں میں اس بارش سے جان پڑجائے گی۔ راولپنڈی اسلام آباد میں ہلکی بوندا باندی کے بعد موسم مزید سرد ہو گیا ہے ، جڑواں شہروں میںکم سے کم درجہ حرارت دس جبکہ زیادہ سے زیادہ بائیس ڈگری سینٹی گریڈ رہنے کا امکان ہے ، موسم کا حال بتانے والوں کا کہنا ہے کہ منگل سے جمعرات کے دوران خیبرپختونخوا، بالائی پنجاب، فاٹا، اسلام آباد ، گلگت بلتستان اور کشمیر میں کہیں کہیں جبکہ کوئٹہ ، ژوب ڈویژ ن میں چند مقامات پر بارش اور پہاڑوں پر برفباری کا امکان ہے۔

اس دوران مالاکنڈ ، ہزارہ ڈویڑن ، گلیات ، گلگت بلتستان اور کشمیر کے پہاڑی علاقوں میں برفباری متوقع ہے۔ وقفے وقفے سے جاری بارش کی وجہ سے خیبرپختونخوا ، گلگت بلتستان اور کشمیر کے پہاڑی علاقوں میں لینڈ سلائیڈنگ کا خدشہ ہے۔ گزشتہ روز سب سے زیادہ سردی سکردو میں پڑی جہاں پارہ منفی آٹھ ڈگری سینٹی گریڈ تک گر گیا۔