بٹگرام میں یونیورسٹی کیمپس کے قیام کیلئے مفاہمتی یاداشت پر دستخط،بہت جلد کلاسز کے اجراء کا اعلان

بدھ اپریل 21:54

پشاور۔ (اُردو پوائنٹ اخبارتازہ ترین۔ 18 اپریل2018ء) ضلع بٹگرام میں یونیورسٹی کیمپس کے قیام کیلئے محکمہ اعلیٰ تعلیم خیبرپختونخوا اور ہزارہ یونیورسٹی کے مابین مفاہمتی یاداشت پر دستخط کئے گئے۔ اس سلسلے میں وزیراعلیٰ ہائوس پشاور میں ایک سادہ مگر پروقار تقریب ہوئی۔ محکمہ اعلیٰ تعلیم اور ہزارہ یونیورسٹی کے نمائندوں نے وزیراعلیٰ خیبر پختونخوا پرویز خٹک کی موجودگی میں یاداشت پر دستخط کئے۔

تاج محمد ترند کی سربراہی میں بٹگرام سے عمائدین کے 25 رکنی وفد کے علاوہ یوسف ترند ، ضلع ناظم بٹگرام اور متعلقہ محکموں کے نمائندوں نے تقریب میں شرکت کی ۔ وزیراعلیٰ پرویز خٹک نے کیمپس کے تحت بلاتاخیر کلاسز شروع کرنے کی ہدایت کرتے ہوئے کہاکہ یونیورسٹی کیمپس بٹگرام کے عوام کا حق ہے ۔

(جاری ہے)

حکومت نے اپنی ذمہ داری پوری کی ہے۔ ہم برائے نام افتتاح پر یقین نہیں رکھتے بلکہ عملی اقدامات کرتے ہیں۔

عوام کو معیاری تعلیم کے مواقع کی فراہمی شروع دن سے ہی صوبائی حکومت کی ترجیح رہی ہے ۔ تاج محمد ترند، یوسف ترند، ضلع ناظم بٹگرام اور متعلقہ محکموں کے نمائندوں نے بھی تقریب سے خطاب کیا اور صوبائی حکومت کی کارکردگی کو سراہا۔انہوںنے یونیورسٹی کیمپس کے قیام پر وزیراعلیٰ کا شکریہ ادا کیا اور کہا کہ یہ ضلع کے عوام کا دیرینہ مطالبہ تھا جو موجودہ صوبائی حکومت نے پورا کردیا۔ اس موقع پر وزیراعلیٰ کی طرف سے کیمپس کلاسز جلد شروع کرنے کی ہدایت پر متعلقہ حکام نے بتایا کہ وہ اس سلسلے میں پہلے سے تیار ی کر چکے ہیں۔ بہت جلد کلاسز شروع کر رہے ہیں۔