اعلیٰ تعلیم کا فروغ موجودہ حکومت کی اولین ترجیحات میں شامل ‘

فروغ کے لئے 35 ارب روپے مختص کئے

جمعرات اپریل 12:18

اسلام آباد ۔ (اُردو پوائنٹ اخبارتازہ ترین۔ 19 اپریل2018ء) ملک میں پرائمری سے لے کر پوسٹ ڈاکٹریٹ تک اعلیٰ تعلیم کا فروغ موجودہ حکومت کی اولین ترجیحات میں شامل ہے اورحکومت نے اعلیٰ تعلیم کے فروغ کے لئے 35 ارب روپے مختص کئے ہے۔ وزارت منصوبہ بندی، ترقی و اصلاحات کے حکام نے ’’اے پی پی‘‘ کو بتا یا کہ مالی سال 2016-17ء میں ملک میں اعلیٰ تعلیم کے فروغ کے لئے 21 ارب روپے مختص کئے گئے تھے جبکہ مالی سال 2017-18ء کے وفاقی ترقیاتی پروگراموں میں اس مد میں 35 ارب روپے مختص کئے گئے ہیں۔

اعلیٰ تعلیم کے فروغ کے لئے وفاقی وزیر منصوبہ بندی، ترقی و اصلاحات پروفیسر احسن اقبال نے ہائر ایجوکیشن کمیشن کو سٹرٹیجک فریم ورک 2025ء کی تیاری کی ہدایات پہلے سے ہی جاری کی ہیں۔ یہ فریم ورک ملک میں اعلیٰ تعلیم کے معیار کو دنیا بھر میں اعلیٰ تعلیم کے بدلتے ہوئے رجحانات کے مطابق لانے میں مدد گار ثابت ہو گا۔

(جاری ہے)

علاوہ ازیں یہ فریم ورک مستقبل کے لئے اعلیٰ تعلیم کی سمت اور منزل کا تعین کرے گا اور اعلیٰ تعلیم کے لئے پانچ سالہ تعلیمی منصوبے اور قلیل المدتی منصوبوں کیلئے رہنمائی کرے گا، موجودہ حکومت نے چار برسوں میں اعلیٰ تعلیم کا بجٹ دوگنا کر دیا ہے۔

حکام کے مطابق ایک طرف پاک چین اقتصادی راہداری کے تحت تعلیم بالخصوص تکنیکی مہارت کے منصوبے شامل ہیں جبکہ دوسری جانب امریکا کے ساتھ تعلیمی راہداری (نالج کوریڈور) قائم کی گئی ہے جس کے تحت 10ہزار پی ایچ ڈی سکالرز تیارکئے جائیں گے۔