مخالفین کی بھی تعریف ،عمران خان خرید و فروخت کو بانسر مار کر سب پر بازی لے گئے ‘عبدالعلیم خان

شفاف کردارکی حامل قیادت ہی ملک کو موجودہ بحرانوں اور کرپٹ حکمرانوں سے نجا ت دلا سکتی ہے ‘بیان

جمعرات اپریل 18:42

مخالفین کی بھی تعریف ،عمران خان خرید و فروخت کو بانسر مار کر سب پر بازی ..
لاہور(اُردو پوائنٹ اخبارتازہ ترین۔ 19 اپریل2018ء) پاکستان تحریک انصاف سنٹرل پنجاب کے صدر عبدالعلیم خان نے کہا ہے کہ عمران خان نے خرید وفروخت کی سیاست کو بانسر مار کر سب پر بازی لے گئے ہیں،کپتان نے ووٹ بیچنے والے 20 ارکان کو شوکاز نوٹس جاری کرکے نئی تاریخ رقم کردی ہے جس کی مخالفین بھی تعریف کرنے پر مجبور ہو گئے ہیں،شفاف کردار کی حامل قیادت ہی پاکستان کو بحرانوں اور کرپٹ حکمرانوں سے سے نکال سکتی ہے،29اپریل کا تاریخی جلسہ شریفوں کو رخصتی کا پروانہ جاری کرے گا۔

عبدالعلیم خان نے اپنے بیان میں کہا کہ پی ٹی آئی نے ووٹوں کی خریدوفروخت میں ملوث ارکان کو احتساب کے کٹہرے میں کھڑا کرکے وہ کام کیا ہے جس کا پاکستانی سیاست میں تصور نہیں کیا جاسکتا، نظریہ ضرورت کے تحت فیصلوں کی تاریخ رکھنے والی سیاسی پارٹیوں کی موجودگی میں اتنا بڑا قدم عمران خان کے ویژن اور پاکستان کے روشن مستقبل کا عکاس ہے۔

(جاری ہے)

عبدالعلیم خان نے کہا کہ ملک میں عدل و انصاف کا نظام لانے کیلئے آئین اور قانون کی حکمرانی ہونا چاہیے، جس پارٹی کا نااہل قائد ہی عدلیہ اور اداروں کے فیصلوں کو ماننے کے بجائے درباریوں کو بغاوت پر اکسانے کی پالیسی پر کاربند ہواس کے ہاتھوں میں ملک کی باگ ڈور دینے سے صرف تباہی پھیلے گی۔

انہوں نے کہاکہ عوام کرپٹ ٹولے کی آمرانہ سوچ سے تنگ آچکے ہیں،،نگران حکومت بنتے ہی شریفوں کی ڈولتی کشتی خالی رہ جائے گی۔۔عبدالعلیم خان نے کہا کہ عمران خان نے مخالفین کو واضح پیغام دیدیا کہ ووٹ کو عزت ووٹرز کے اعتماد کی قدر کرنے سے ملتی ہے،کمائی کیلئے ووٹرز کا بھروسہ بیچ دینے والے کسی صورت عوام کے نمائندے نہیں ہوسکتے، انہوں نے کہا کہ کرپشن کا مال بنانے اور چھپانے کیلئے باریاں لینے والے شاہی خاندانوں کیلئے سیاست ایک تجارت ہے،وفاداریاں خرید لو اور قوم کے مفادات بیچ دو کا منشور رکھنے والے شریفوں اور زرداریوں کو اب اقتدار کی راہداریوں سے گزرنے کا بھی موقع نہیں ملے گا۔

عبدالعلیم خان نے کہا کہ پی ٹی آئی چندماہ میں ہی مقبولیت کی سیڑھیاں چڑھتے ہوئے عوام کے دلوں میں گھر کرچکی ہے،،عمران خان کی بہادارانہ اور بے لوث قیادت قوم کیلئے روشن مستقبل کی امید ہے۔انہوں نے کہا کہ مینار پاکستان پر جلسہ کیلئے تیاریاں عروج پر پہنچ چکی ہیں اور انشا اللہ 29اپریل کو اس تاریخی مقام پر عوام کا سیلاب کرپٹ ٹولے کی سیاست کو بہا لے جائے گا۔