دوسرا حماد اظہر فلڈ لائٹ کرکٹ ٹورنامنٹ کا افتتاح ہوگیا

جمعرات 19 اپریل 2018 20:20

لاہور (اُردو پوائنٹ اخبارتازہ ترین - آن لائن۔ 19 اپریل2018ء) پاکستان تحریک انصاف لاہور کے زیر اہتمام دوسرا حماد اظہر فلڈ لائٹ کرکٹ ٹورنامنٹ کا افتتاح ہوگیا ہے۔ این اے 126کی 2سو سے زائد ٹیمیں حصہ لے رہی ہیں۔ سبزہ زار کرکٹ سٹیڈیم میں افتتاحی تقریب کا آغاز زبر دست روشنیوں اورآتش بازی سے کیاگیا۔ تحریک انصاف کے این اے 126سے امیدوار میاں حماد اظہر نے ٹورنامنٹ کا افتتاح کیا اس موقع پر ایم پی اے میاں اسلم اقبال، شیخ امتیاز محمود، حاجی ارشاد ڈوگر، میاں محمد زاہد، ملک یونس، شبیر ملک، فیصل چوہدری، ارسلان گجر بھی موجود تھے۔

میاں حماد اظہر نے افتتاحی تقریب سے خطاب کرتے ہوئے کہاکہ تحریک انصاف کے زیر اہتمام یہ دوسرا ٹورنامنٹ منعقد کرایا جارہا ہے، جس کامقصد صرف نوجوانوں کی مثبت سرگرمیوں کو آگے لاکر انہیں زندگی میں محنت اورجدوجہد کی طرف مائل کرنا ہے۔

(جاری ہے)

پچھلے ٹورنامنٹ کے مقابلے میں امسال زیادہ ٹیموں نے حصہ لیا، ہم نے کسی کو بھی سیاسی وابستگی کے بغیر ٹورنامنٹ میں شامل کیا ہے، کیونکہ ہم سمجھتے ہیں کہ نوجوان ملک و قوم کاسرمایہ ہیں اور انہیں اپنی کارکردگی دکھانے کیلئے آگے لانا چاہئے۔

اس موقع پر ایم پی اے میاں اسلم اقبال نے کہاکہ تحریک انصاف نے ملک میں مثبت سرگرمیوں کو ہمیشہ فروغ دیا ہے، کیونکہ اب قوم کو ترقی کا سفر طے کرنا ہے، ہم نے پسماندہ قوم نہیں رہنا، جنہوںنے ملک کو نچوڑا، قوم کے ساتھ ظلم و زیادتی کی، بلاتمیز ہر نسل کے شہری کے حق پر ڈاکہ ڈالا ہماری جنگ ان کے ساتھ ہے اور عمران خان کی قیادت میں نوجوان نسل یہ جنگ ضرورت جیتے گی۔

انہوں نے کہا کہ کل تک فرشتہ صفت ہونے کے دعویدار نیب اور قومی اداروں کے سامنے کھل کر آگئے ہیں۔ ریاستی اداروں کیخلاف بغاوت کے مشورے دے رہے ہیں، قومی اداروں کو پہلے تباہ و برباد کیا اب ان کی تلاشی لینے کا وقت آیا تو عوام کو بدظن کرنے کی کوشش کررہے ہیں لیکن تحریک انصاف ریاست کے ہر ادارے کے ساتھ ہے جو ملک و قوم کیلئے کچھ اچھا کرنا چاہتا ہے، ہم پاک فوج اور عدلیہ اور نیب کو ہر قسم کے تعاون کی یقین دہانی کراتے ہیں کیونکہ ہم سمجھتے ہیں کہ ان اداروں نے قوم کی قسمت بدلنے کی ٹھان لی ہے جبھی تو ہر جلسے میں پوچھا جارہا ہے کہ مجھے کیوں نکالا بھائی آپ کو قوم سے غداری، لوٹ ماراور چوری چکاری اور اداروں کیخلاف بغاوت پر نکالا گیا ہے، اگر تفصیلات جاننا چاہتے ہو تو آجائو تمہیں لکھ کردیدیں گے۔

Facebook Twitter Google + Share on Whatsapp

دوسرا حماد اظہر فلڈ لائٹ کرکٹ ٹورنامنٹ کا افتتاح ہوگیا

متعلقہ عنوان :

مزید قومی خبریں