ڈی پی او ایبٹ آباد سے پولیس کے ریٹائرڈ ملازمین کی ملاقات

جمعہ 4 مئی 2018 12:04

ایبٹ آباد۔ (اُردو پوائنٹ اخبارتازہ ترین - اے پی پی۔ 04 مئی2018ء) ڈسٹرکٹ پولیس آفس ایبٹ آباد میں ڈی پی او ایبٹ آباد سید اشفاق انور کی ضلع ایبٹ آباد پولیس سے ریٹائرڈ پولیس ملازمین کے ہمراہ میٹنگ کا انعقاد کیا گیا جس میں ایبٹ آباد سے ریٹائرڈ ہونے والے پولیس ملازمین نے کثیر تعداد میں شرکت کی۔ میٹنگ کے دوران ڈسٹرکٹ پولیس آفیسر سید اشفاق انور نے خطاب کرتے ہوئے کہا کہ ریٹائرڈ ملازمین اب بھی محکمہ کا حصہ ہیں اب بھی ان کی اتنی ہی عزت ہے جو دوران ملازمت تھی۔

ایبٹ آباد پولیس نے گذشتہ ایک سال سے یہ سلسلہ شروع کیا ہے کہ جو بھی ملازم محکمہ سے ریٹائرڈ ہوتا ہے اس کے اعزاز میں پروقار تقریب کے انعقاد کے ساتھ ساتھ شان و شوکت سے محکمہ سے الوداع کیا جاتا ہے۔ ڈسٹرکٹ پولیس آفیسر ایبٹ آباد سید اشفاق انور نے خطاب کرتے ہوئے کہا انہیں اس بات کی خوشی ہے کہ جتنے بھی ملازم محکمہ سے ریٹارڈ ہوئے ان میں سے کسی بھی ملازم کی کوئی فائل پینڈنگ نہیں اور تمام سٹاف کو خصوصی ہدایت ہے کہ ریٹائرڈ ملازمین کو کسی قسم کی کوئی پریشانی نہ ہو جس کسی کا بھی جائز مسئلہ ہو تو کوشش کی جائے کہ وہ ترجیح بنیادوں پر حل کیا جائے۔

(جاری ہے)

ریٹائرڈ ملازمین کے ساتھ بھی وہی سلوک بھرتا جائے جو دوران ملازمت کسی ملازم کے ساتھ کیا جاتا ہے، انہیں عزت دی جائے اور ان کی عزت نفس کا خیال رکھا جائے، یہ ہمارے محکمہ کا حصہ تھے، ہیں اور رہیں گے۔ اس کے علاوہ بھی پنشنرز کو کبھی بھی کوئی بھی مسئلہ ہو ہمارے دروازے ہر وقت کھلے ہیں، انشاء الله ہم آپ کو مایوس نہیں کریں گے۔ میٹنگ کے دوران ڈسٹرکٹ پولیس آفیسر ایبٹ آباد سید اشفاق انور نے ریٹائرڈ ملازمین کے مسائل سنے اور ان کے فوری حل کی یقین دہانی کروائی اور ایڈیشنل ایس پی ایبٹ آباد کو پنشنرز کے تمام معاملات کی دیکھ بھال کی ہدایت جاری کی۔

دوران میٹنگ ریٹائرڈ ملازمین نے ڈی پی او ایبٹ آباد سید اشفاق انور کا شکریہ ادا کیا کہ انہیں اپنے مسائل بیان کرنے اور سننے کا اتنا اچھا موقع فراہم کیا گیا۔